تلنگانہ کانگریس کے رہنماؤں نے اپنی پارٹی کے ارکان اسمبلی کو راغب کرنے کیلئے حکمران جماعت ٹی آر ایس کے آپریشن آکرش کے خلاف اسمبلی کے احاطہ میں گاندھی جی کے مجسمہ کے سامنے سیاہ بیچس لگا کر احتجاج کیا۔
اس دھرنے کی قیادت تلنگانہ کانگریس کے صدر اتم کمار ریڈی نے کی جنہوں نے الزام لگایا کہ ٹی آر ایس سربراہ اور وزیراعلی کے چندر شیکھر راو کانگریس پارٹی میں انحراف کی حوصلہ افزائی کر رہے ہیں۔
انہوں نے کانگریس کے دو ارکان اسمبلی کی ٹی آر ایس میں شمولیت کے اعلان کے لیے وزیراعلی کو ذمہ دار قرار دیا اور کہا کہ ٹی آر ایس جس کو اسمبلی میں واضح اکثریت حاصل ہے، اصل اپوزیشن کے ارکان کو انحراف کے لیے اکسا رہی ہے۔
انہوں نے کہاکہ ٹی آرایس دستور کا احترام نہیں کرتی اور نہ ہی قانون انسداد انحراف کا کوئی احترام کیا جارہا ہے۔
انہوں نے سوال کیا کہ کانگریس کے دو ارکان اسمبلی کو کتنی رقم میں خریدا گیا ہے اس بات کا جواب چندرشیکھرراو دیں۔ انہو ں نے کہا کہ اسمبلی کے ڈپٹی اسپیکر کے عہدہ کے انتخاب کے لئے کانگریس نے حمایت کی تھی اور اس اہم عہدہ کے لئے متفقہ انتخاب میں تعاون کیا تھا۔ اس کے باوجود مسٹر راو کانگریس کو توڑنے کا کام کررہے ہیں۔
قبل ازیں کانگریس کے دو ارکان کی ٹی آرایس میں شمولیت کے اعلان کے بعد پارٹی کی تیز تر سرگرمیاں دیکھی گئیں۔
کانگریس نے اس صورتحال پر تبادلہ خیال کیلئے سی ایل پی کا ہنگامی اجلاس طلب کیا تاہم اس اجلاس میں پارٹی کے دو ارکان اسمبلی غیر حاضر رہے۔ اس ہنگامی اجلاس سے رویندر ریڈی اور روہت ریڈی حاضر نہیں ہوئے۔
اجلاس نے کانگریس کے ارکان اسمبلی کو راغب کرتے ہوئے ٹی آر ایس میں شامل کرنے حکمراں جماعت کے آپریشن آکرش پر شدید برہمی کا اظہار کیا۔اس اجلاس کے درمیان سے ہی کانگریس کے رکن اسمبلی کومٹ ریڈی راج گوپال ریڈی باہر آگئے۔
انہوں نے نے پارٹی قیادت پر شدید نکتہ چینی کی ۔انہوں نے کہا کہ پارٹی کو مضبوط قیادت کی ضرورت ہے ۔ اسمبلی انتخابات سے قبل بھی انہوں نے یہ بات کہی تھی اور وہ اسی بات کا اعادہ کررہے ہیں جو بات قبل ازیں کہی گئی تھی۔ انہوں نے کہا کہ پارٹی کے ان قائدین کے ذریعہ کوئی جوش پیدا نہیں ہوسکتا۔
انہو ں نے پارٹی ہائی کمان سے اپیل کی کہ ریاستی پارٹی کی قیادت کو تبدیل کیا جائے ۔ منوگوڑو سے کانگریس کے رکن اسمبلی سی ایل پی کے ہنگامی اجلاس سے درمیان میں ہی چلے گئے ۔ انہو ں نے کہا کہ پارٹی کے ایک لیڈر کی موت پر وہ اپنے حلقہ کو جارہے ہیں۔
