تلنگانہ کے وزیر خزانہ ٹی ہریش راؤ نے اگنی پتھ اسکیم کے خلاف احتجاج کرنے والے بے روزگار نوجوانوں پر جھوٹے مقدمات درج کرتے ہوئے انہیں ڈرانے کا الزام عائد کیا۔ منتھنی میں مدر اینڈ چائلڈ سنٹر کا افتتاح کرتے ہوئے ان خیالات کااظہار کیا۔ اس موقع پر ریاستی وزیر کے ایشور بھی موجود تھے۔ Harish Rao on BJP ہریش راؤ نے کہا کہ بی جے پی کے غلط فیصلوں سے نوجوان سڑکوں پر نکل کر احتجاج کرنے کےلیےمجبور ہوئے ہیں ۔ ملک میں 16 لاکھ سے زائد سرکاری جائیدادیں مخلوعہ ہیں۔ مرکزی حکومت ان جائیدادوں پر تقررات کرنے کے معاملے میں غفلت اور لاپرواہی کا مظاہرہ کررہی ہے۔ سرکاری اداروں کو فروخت کردیا جارہا ہے۔ ہریش راؤ نے کہا کہ جن ریاستوں میں انتخابات ہونے والے ہیں۔ وہاں بی جے پی مذہبی جذبات بھڑکاتے ہوئے سیاسی فائدہ اٹھانے کی کوشش کررہی ہے۔
وزیراعلی کے سی آر کی قیادت میں ریاست تلنگانہ 7 سال کے دوران ہر شعبہ میں بڑی تیزی سے ترقی کررہی ہے۔ بالخصوص محکمہ آبپاشی ، تعلیم، طب میں مثالی ترقی ہورہی ہے۔ ریاست میں 30 میڈیکل کالجس قائم کئے گئے ہیں ۔ متحدہ ضلع کریم نگر میں چار نئے میڈیکل کالجس قائم کئے گئے ہیں۔ ہریش راؤ نے کہا کہ مرکز کی ڈبل انجن کی سرکار ٹربل انجن میں تبدیل ہوگئی ہے۔
