وزیراعلی کے چندر شیکھر راؤ کی ہدایات پر عمل کرتے ہوئے، تلنگانہ کے چیف سکریٹری سومیش کمار نے جمعہ کے روز فوج کے عہدیداروں سے بات کی اور ان سے اپیل کی کہ وہ سیلاب زدہ ضلع بھدرادری میں امداد فراہم کریں۔یہاں ایک سرکاری بیان میں کہا گیا ہے کہ کمار کی درخواست پر فوج کے 101 فوجی اہلکار ، جن میں 68 انفنٹری، 10 طبی عملے اور 23 انجینئرسیلاب سے متاثرہ بھدرادی ضلع کے لیے روانہ ہو گئے ہیں۔بیان میں کہا گیا ہے کہ مذکورہ فوجی پانچ آزاد ٹیموں کی شکل میں راحت اور بچاؤ کی کارروائیاں کرنے کی صلاحیت رکھتے ہیں۔ Army Called out for Relief Measures
دوسری جانب محکمہ سیاحت نے راحت اور بچاؤ کاموں میں مدد کے لیے عملے کے ساتھ چار خصوصی کشتیاں بھدرادری ضلع بھیجی ہیں۔ اس کے ساتھ ہی فائر ڈپارٹمنٹ نے 210 لائف جیکٹس کے ساتھ سات کشتیاں بھی بھیجی ہیں۔
ریاستی حکومت نے سنگارینی کولیریز کے منیجنگ ڈائریکٹر این سری دھر کو ضلع میں امدادی کارروائیوں کی نگرانی کے لیے ایک خصوصی افسر کے طور پر مقرر کیا ہے۔ بیان میں کہا گیا ہے کہ سنگرینی کولیری کے ساتھ بھدراچلم میں دستیاب انفراسٹرکچر کو سیلاب کی امدادی کارروائیوں کے لیے استعمال کیا جائے گا۔ چیف سکریٹری نے سیلاب کی صورتحال کا جائزہ لیا اور حکام سے کہا کہ وہ اس بات کو یقینی بنائیں کہ سیلاب سے کوئی جانی نقصان نہ ہو۔ بیان میں کہا گیا ہے کہ کمار ہر آدھے گھنٹے بعد سیلاب کی صورتحال کا جائزہ لے رہے ہیں۔
یو این آئی
