اے آئی اے ڈی ایم کے پارٹی نے اعلان کیا کہ اے آئی اے ڈی ایم کے زیرقیادت حکومت کی جانب سے باپ بیٹے کے لواحقین کو دیئے گئے بیس لاکھ کے علاوہ پارٹی کی جانب سے 25 لاکھ روپئے دیئے جائیں گے۔
وزیراطلاعات سی راجو نے گذشتہ روز کلکٹر سندیپ نندوری کے ہمراہ وزیراعلیٰ کے پلانی سوامی کی جانب سے اعلان کردہ معاوضہ کوغم زدہ خاندان کے حوالے کیا۔
حزب اختلاف ڈی ایم کے پارٹی نے بھی گذشتہ روز غم زدہ خاندان کو 25 لاکھ رپئے کی رقم حوالے کی تھی۔ رکن پارلیمنٹ کنی موزی نے سوگوار لواحقین سے ملاقات کی تھی اور ڈی ایم کے، چیف، ایم کے اسٹالن کی جانب سے اعلان کردہ 25 لاکھ روپئے کا چیک حوالے کیا اور اہل خانہ کو پارٹی کی مکمل حمایت کا یقین دلایا تھا۔
دریں اثنا تھوتھوکڈی سپرنٹنڈنٹ آف پولیس نے باب اور بیٹے کی مبینہ حراست میں ہوئی موت کے سلسلہ میں 26 جون کو مدراس ہائیکورٹ میں اسٹیٹس رپورٹ پیش کی۔ ویڈیو کانفرنسنگ کے ذریعہ پیش ہوتے ہوئے ایس پی نے بتایا کہ پوسٹ مارٹم کا عمل مکمل ہوچکا ہے لیکن کرفیو کی وجہ سے رپورٹ پیش نہیں کی جاسکی۔
واضح رہے کہ پی جئے راج اور ان کے بیٹے جے بینکس کو 19 جون کو گرفتار کیا گیا تھا جبکہ ان پر لاک ڈاون کے دوران عائد کرفیو میں دوکان کھلی رکھنے کا الزام تھا اور انہیں کویلپٹی جیل بھیج دیا گیا تھا۔ بعدازاں انہیں 22 جون کو کویلپٹی کے سرکاری ہسپتال میں داخل کرایا گیا تھا جبکہ اسی رات بیٹے کی موت ہوگئی اور والد نے 23 جون کو آخری سانس لی تھی۔
