پڈوچیری میں راج بھون حلقہ سے کامیاب کانگریس کے رکن اسمبلی لکشمی نارائنن نے آج اسپیکر وی پی سیوا کولندھو کو اپنا استعفیٰ پیش کیا جس کے بعد انہوں نے میڈیا کو بتایا کہ ’نارائن سوامی کی سربراہی والی حکومت اکثریت کھوچکی ہے۔ انہوں نے پارٹی کی ابتدائی رکنیت سے بھی استعفیٰ دے دیا۔
لکشمی نارائنن کے استعفیٰ کے بعد کانگریس کی عددی طاقت کم ہوکر صرف 13 ہوگئی ہے جبکہ اپوزیشن کے پاس 14 ارکان اسمبلی ہیں اور 5 نشستیں فی الحال خالی ہیں۔
سابق وزیر ناماسیوایم اور ملادی کرشنا راؤ کے علاوہ کانگریس کے 4 ارکان اسمبلی نے استعفیٰ دیا ہے جبکہ ایک رکن اسمبلی کو پہلے ہی نا اہل قرار دیا گیا تھا۔
تلنگانہ کی گورنر تملی سائی سوندرا راجن کو پڈوچیری کا اضافی چارج دیا گیا ہے۔ انہوں نے نارئن سوامی کی حکومت کو 22 فروری کو فلور ٹسٹ میں اکثریت ثابت کرنے کی ہدایت دی ہے۔
