کشمیر میں اتوار کی رات سے ہی میدانی علاقوں میں بارش کا سلسلہ شروع ہوا جبکہ بالائی علاقوں میں ہلکی سے اوسط درجے کی برف باری ہوئی۔ محکمہ موسمیات نے پیش گوئی کی ہے کہ بارش اور برفباری کا یہ سلسلہ جمعرات کی صبح تک جاری رہے گا۔ برف باری کی وجہ سے سرینگر - لیہہ قومی شاہراہ اور مغل روڈ بند کر دیا گیا ہے۔
اتوار کی رات کو میدانی علاقوں میں ہلکی بارش کا آغاز ہوا جبکہ پیر کی صبح سے ہی اس کی شدت میں اضافہ ہوا۔ محکمہ موسمیات کے عہدیداروں نے بتایا کہ گلمرگ سمیت دیگر پہاڑی مقامات پر ایک فٹ سے زیادہ برف باری ہوئی ہے۔ حکام نے بتایا کہ پیر کی گلی، سادھنہ ٹاپ، کرناہ، کپواڑہ، زوجیلا پاس سمیت دیگر مقامات پر بھی ہلکی برف باری ہوئی۔
وادی کے متعدد قصبوں میں بھی برف باری ریکارڈ کی گئی۔ اونچائی والے علاقوں پر تازہ برف باری سے سیاحتی سرگرمیاں بحال ہونے کی اُمید ہے۔ گلمرگ میں برف باری نے سیاحوں کو راغب کیا ہے۔
پیر کے روز جاری ہونے والی ایک موسمی ایڈوائزری کے مطابق بارش اور برف کا سلسلہ جمعرات کی دوپہر تک جاری رہنے کا امکان ہے۔
محکمہ موسمیات کے اعداد و شمار کے مطابق سری نگر میں گذشتہ دو روز کے دوران 5.7 ملی میٹر بارش ریکارڈ کی گئی جبکہ گلمرگ میں 24 ملی میٹر، قاضی گند میں 4.2 ملی میٹر، پہلگام میں 22.9 ملی میٹر، کپواڑہ میں 14 ملی میٹر، بنیہال میں 14.4 ملی میٹر، بٹوٹ میں 4.4 ملی میٹر اور بھدرواہ میں 2.8 ملی میٹر بارش ریکارڈ کی گئی۔
