مغربی افریقی ملک سیرالیون کے دورے پر گئے وینکیا نائیڈو نے پیر کو بھارتی برادری سے خطاب کرتے ہوئے کہا کہ بھارت کا ایک پڑوسی ملک دہشت گردوں کو تعاون اور سرمایہ فراہم کرنے کے ساتھ ساتھ اشتعال انگیز سرگرمیوں کو انجام دے رہا ہے جو تشویشناک ہے۔
انہوں نے کہا کہ دہشت گردی کا کوئی مذہب نہیں ہوتا اور انسانیت کے دشمن دہشت گردی کی شکل اختیار کرچکے ہیں۔ دہشت گردی کے واقعات میں ہزاروں لوگ مارے جاچکے ہیں۔ انہوں نے دہشت گردی کو بڑھاوا دینے والے چند ممالک کے خلاف کارروائی اور ایسی سرگرمیوں کے لیے سرمایہ فراہم کرانے پر پابندی عائد کرنے کی یقین دہانی کے لئے عالمی برادری سے متحد ہونے کی اپیل کی۔
انہوں نے جموں و کشمیر میں پھیلائے جارہے منفی پروپیگنڈے کا ذکر کیا اور بھارتی برادری سے صحیح تصویر پیش کرکے اس کا موثر جواب دینے کی اپیل کی۔ وینکیا نائیڈو نے کہا کہ بے بنیاد اطلاعات کے تشہیر پر روک لگانے کا ایک بہترین موقع ہے۔
انہوں نے کہا کہ بھارت ایسا ملک ہے جہاں صدر، نائب صدر، وزیراعظم، اعلی عدالت کے جج اور دفاعی فورسز کے سربراہ بھی اقلیتی برادری سے رہ چُکے ہیں۔ نائب صدر نے جمہوریہ سیرالیون کی قومی پارلیمنٹ کے اسپیکر عباس چرنور بوندی سے بھی ملاقات کی۔
