سرینگر (جموں کشمیر) : پیران پیر، غوث الاعظم کے القاب سے معروف شیخ سید عبد القادر جیلانی رحمہ اللہ کے عرس پاک کے موقع پر جموں کشمیر کے طول و ارض میں مساجد و خانقاہوں اور بقعہ جات میں تقاریب کا انعقاد عمل میں لایا گیا۔ اس ضمن میں وادی کشمیر میں سب سے بڑی تقریب آستان عالیہ دستگیر صاحب خانیار میں منعقد کی گئی جس میں ہزاروں عقیدت مندوں نے شرکت کی۔
آستانہ عالیہ خانیار میں گزشتہ 11 دنوں سے عرس پاک کی نسبت سے ختمات المعظمات، اورادِ قادریہ کے علاوہ نعت و درود کی مجالس آراستہ ہوئیں۔ قبل ازیں گزشتہ شب وادی کے اطرف و اکناف سے آئے عقیدت مندوں نے شب خوانی میں شرکت کرکے پیران پیر کے تئیں اپنی عقیدت و محبت کا اظہار کیا۔ نماز جمعہ کے موقع پر آستان عالیہ خانیار میں ہزاروں عقیدت مندوں نے جمعہ کی نماز میں شرکت کی جبکہ اس موقع پر ’’یا شیخ سید عبدالقادر شیئا للہ‘‘ کے نعروں کے بیچ تبرکات کی نشاندہی کی گئی۔
مزید پڑھیں: Reshimol Sahab URS concludes : ریشی مول صاحب کا عرس عقیدت و احترام سے منایا گیا
آستان عالیہ کے سجادہ نشین معراج الدین نے میڈیا نمائندوں کے ساتھ بات کرتے ہوئے کہا کہ ہر سال کی طرح رواں برس بھی عقیدت مندوں کے لیے بہتر انتظامات کیے گئے تھے جبکہ عرس پاک کی نسبت سے ہفتہ کے روز اختتامی مجلس منعقد ہوگی۔ قبل ازیں خطبہ جمعہ سمیت گزشتہ شب جاری رہنے والی مجالس کے دوران واعظین نے پیران پیر شیخ سید عبد القادر جیلانی رحمہ اللہ تعالیٰ کی سیرت کے مختلف گوشوں، دعوت و تبلیغ، علم و تصوف اور روحانی کمالات پر روشانی ڈالی۔ دریں اثناء، پیران پیرؒ کے عرس پاک کی نسبت سے آستان عالیہ سرائے بالا سمیت مختلف مساجد و خانقاہوں میں مجالس آراستہ ہوئیں۔
