سرینگر:کشمیر کے ممتاز افسانہ نگار عمر مجید کی برسی کے موقع پر سرینگر کے مقامی ہوٹل میں ایک پروقار تقریب منعقد ہوئی، جس میں عمر مجید کی ادبی خدمات پر ترتیب دی گئی کتاب " بیاد عمر مجید " کی روسم رونمائی انجام دی گئی۔
تقریب کی صدارت معروف افسانہ نگار نور شاہ نے کی، جبکہ ایوان صدارت میں سرکردہ فکشن نگار وحشی سعید، معروف ادیب اور براڈکاسٹر ڈاکٹر ستیش ومل اور پرفیسر ناصر مرزا بھی موجود تھے۔
اس دوران عمر مجید کی ادبی خدمات پر مبنی نوجوان قلمکار زبیر قریشی اور سہیل سالم کی ترتیب دی گئی کتاب " بیاد عمر مجید" کی رسم رونمائی انجام دی گئی۔ اس موقعے پر افسانہ نگار ناصر ضمیر نے عمر مجید کی یاد میں تحریر کردہ اپنا افسانہ " یادوں کا موسم" حاضرین کی نذر کیا۔
وہیں اپنے صدارتی کلمات میں نور شاہ نے عمر مجید پر اپنی تحریر کردہ عبارت پیش کی جبکہ وحشی سعید، پرفیسر ناصر مرزا، ڈاکٹر ستیش ومل اور جاوید آزر نے عمر مجید کی ادبی خدمات کو شاندار الفاظ میں یاد کیا۔
تقریب میں وادی کشمیر کے معروف معالج ڈاکٹر نوید نظیر کو ان کی خدمات کے عوض جبکہ زبیر قریشی اور سہیل سالم کو عمر مجید کی بیاد مرتب کرنے پر اعزاز سے نوازا گیا۔ وہیں سول سوسائٹی کی جانب سے عمر مجید کے فرزند عارف عمر مجید کی بھی عزت افزائی کی گئی۔
مزید پڑھیں:
