ٹرانسپورٹرز معاشی پیکج میں نظر انداز

ٹرانسپورٹرز کے مطابق وادی کشمیر کے مختلف اڈوں میں ہزاروں گاڑیاں گزشتہ ایک برس سے بے کار پڑی ہیں۔

سرینگر کے پارمپورہ بس اڈے میں ان گاڑیوں کا پہیہ جام ہے- پہلی دفعہ 370 کی منسوخی کے بعد انتظامیہ کی جانب سے کرفیو نافذ ہونے سے یہ گاڑیاں پانچ ماہ تک بند رہیں- پھر رہی سہی کسر کووڈ 19 اور اس کے بعد عائد لاک ڈاؤن نے پوری کردی-

تقریباً ایک برس تک بند رہنے کے بعد انکی نظریں ایل جی منوج سنہا کی طرف سے معاشی پیکیج پر تھیں لیکن اعلان کے بعد یہ مایوس ہوکر رہ گئے ہیں۔

گزشتہ ہفتے ایل جی نے کووڈ-19 لاک ڈاون کے دوران تجارت کو ہونے والے نقصان کی بھرپائی کے لیے 1350 کروڑ کا معاشی پکیج کا اعلان کیا-

اگرچہ تجار نے ایل جی کے اس اعلان کو اچھی شروعات قرار دیتے ہوئے کہا کہ اس پکیج سے کچھ حد تک ان کو راحت ملے گی- تاہم وادی کشمیر میں ٹرانسپورٹ کے شعبے سے منسلک افراد ایل جی انتظامیہ سے پیکج کے حوالے سے ناراض ہیں۔

ٹرانسپورٹرز کے مطابق وادی کشمیر کے مختلف اڈوں میں ہزاروں گاڑیاں گزشتہ ایک برس سے بے کار پڑی ہیں۔ ان کا کہنا ہے کہ کشمیر میں گاڑیوں سے تقریباً 3 لاکھ افراد کا روزگار منسلک ہے جن میں ڈرائیور، کنڈکٹر اور مکینک وغیرہ شامل ہے- انکا الزام ہے کہ ایل جی نے انہیں پیکج میں نظر انداز کیا گیا ہے-

وادی میں جب بھی حالات خراب ہوتے ہیں اس کی سب سے زیادہ مار ٹرانسپورٹ سیکٹر کو ہی جھیلنی پڑتی ہے، او ستم طریفی یہ ہے کہ یہی شعبہ حکومتی سطح پر سب سے زیادہ نظر انداز کیا جاتا ہے۔