نیشنل کانفرنس کے نائب صدر اور سابق وزیر اعلیٰ عمر عبداللہ نے کہا ہے کہ پانچ اگست کے موقع پر وادی کے حالات کو نارمل دکھانے کے لئے باہر سے صحافیوں کو سری نگر پہنچایا گیا ہے۔
انہوں نے سی پی آئی (ایم) کے سینئر رہنما محمد یوسف تاریگامی کے ایک ٹویٹ کو ری ٹویٹ کرتے ہوئے لکھا: 'تاریگامی صاحب پریشان ہونے کی کوئی بات نہیں ہے، یہاں کے حالات کو نارمل دکھانے کے لئے کچھ سینئر صحافیوں کو سری نگر پہنچایا گیا ہے۔ ایک طرح سے وہ لوگ صحیح ہیں کیونکہ یہ "نیا کشمیر" کے لئے "نیا نارمل" ہے'۔
قبل ازیں تاریگامی نے اپنے ایک ٹویٹ میں کہا تھا: 'آج سیاسی لیڈروں کو ڈاکٹر فاروق عبداللہ کی رہائش گاہ پر خطے کو در پیش سیاسی مشکلات پر گفتگو کرنے کے لئے جمع ہونا تھا لیکن بدقسمتی سے ہمیں اجازت نہیں دی گئی'۔
یہ بھی پڑھیں: آرٹیکل 370 کی منسوخی غیر قانونی اور غلط: چین
قابل ذکر ہے کہ بدھ کے روز ڈاکٹر فاروق عبداللہ کی گپکار میں واقع رہائش گاہ کی طرف جانے والی تمام سڑکوں کو سیل کر دیا گیا تھا۔ نیز بعض رپورٹس کے مطابق کئی سیاسی لیڈروں کی رہائش گاہوں کے گرد وپیش بھی سیکورٹی کا سخت محاصرہ کیا گیا تھا۔
