سرینگر: جموں و کشمیر پولیس نے منگل کو کہا کہ اس نے سرینگر میں ٹریفک بوتھ کو توڑنے کے ساتھ ساتھ ڈیوٹی پر موجود ٹریفک اہلکاروں پر حملہ کرنے کے الزام میں تین ایس ایم سی ملازمین کو گرفتار کیا گیا ہے۔
سرینگر پولیس نے ایک ٹویٹ کے ذریعے جانکاری دیتے ہوئے بتایا کہ’ سرینگر میں ٹریفک رولز کی خلاف ورزی کی پادائش میں ایس ایم سی کے ایک عہدیدار کے خلاف چالان کاٹا گیا تاہم سرینگر میونسپل کارپوریشن کے ملازم نے دیگر ملازمین کے ہمراہ ٹریفک بوتھ کو منہدم کیا اور بعد ازاں ڈیوٹی پر مامور ٹریفک پولیس اہلکاروں پر بھی حملہ کیا۔
انہوں نے کہا کہ پولیس نے شیر گڑھی پولیس تھانے میں تین ایس ایم سی ملازمین کے خلاف مقدمہ درج کیا ۔اس معاملے پر ایک اپ ڈیٹ شیئر کرتے ہوئے، ایک سینیئر پولیس افسر نے کہاکہ تینوں ملزمان کو قانونی کارروائیوں کے بعد اس کیس میں باضابطہ طور پر گرفتار کر لیا گیا ہے۔ تینوں نے ہنگامہ کرنے کے بعد ٹریفک اہلکاروں کو ایک کار میں اغوا بھی کیا تھا۔"
واضح رہے کہ سوشل میڈیا سائٹوں پر وائرل ویڈیو میں صاف دیکھا جاسکتا ہے کہ لل دید سرینگر کے نزدیک ایس ایم سی ملازمین اور ٹریفک پولیس اہلکار آپس میں الجھ پڑے اور ایک دوسرے پر سخت الفاظ استعمال کیے۔
مزید پڑھیں: SMC Turns into Political Circus ایس ایم سی شہر کی تعمیرو ترقی کا مرکزی نہیں بلکہ سیاسی اکھاڑے میں تبدیل
ویڈیو میں ٹریفک پولیس اہلکار نے بتایا کہ ایس ایم سی عہدیدار کو چالان کاٹنا ناگوار گزرا اور اُس نے دیگر ملازمین کے ہمراہ ٹریفک عملے کا ایک بوتھ جے سی بی کے ذریعے مسمار کیا۔سرینگر میونسپل کارپوریشن کے ملازمین کا کہنا ہے کہ انسداد تجاوزات مہم کے تحت لل دید میں غیر قانونی طورپر شاہراہ پر تعمیر کیے گئے ایک ڈھانچے کو مسمار کیا گیا۔
