ذرائع کے مطابق کلسٹر یونیورسٹی کے وائس چانسلر کے عہدے کے لیے 53 درخواستیں موصول ہوئی تھیں۔ اس کے لیے ایک پینل بنایا گیا تھا تاکہ وہ موصولہ درخواستوں میں سے تین ناموں کو منتخب کر کے چانسلر کو سونپ دیں۔
کلسٹر یونیورسٹی کے لیے نئے وائس چانسلر کی تقرری کے سلسلے میں گزشتہ برس نومبر کے مہینے میں ایک نوٹیفیکشن جاری کیا گیا تھا، جس میں اس عہدے کے لیے درخواستیں طلب کی گئیں تھیں۔ یہ دوسری مرتبہ ہے جب وائس چانسلر کی تعیناتی کے لیے درخواستیں طلب کی گئی ہیں۔ اس سے قبل جو کمیٹی بنائی گئی تھی اس کو چانسلر نے کالعدم قرار دے دیا تھا۔
کمیٹی کی سربراہی وائس چانسلر سنٹرل یونیورسٹی آف گجرات کے پروفیسر راما شنکر دوبے بطور چئیرمین کررہے ہیں۔ جبکہ ڈائریکٹر راجیو گاندھی، انسٹی ٹیوٹ آف پیٹرولیم ٹیکنالوجی یوپی پروفیسر اے ایس کے سنہا اور سینٹر منیجمنٹ اسٹڈیز جامعہ ملیہ اسلامیہ نئی دہلی کے پروفیسر ڈاکٹر فرقان قمر کمیٹی کے ممبران ہیں۔
واضح رہے کہ کلسٹر یونیورسٹی کا اضافی چارج اس وقت کشمیر یونیورسٹی کے وائس چانسلر پروفیسر طلعت کے پاس ہیں۔
