سرینگر میں اساتذہ نے احتجاج کرتے ہوئے ایل جی انتظامیہ سے مطالبہ کیا ہے کہ کولگام خودکشی معاملے میں ایک کمیٹی تشکیل کرکے تحقیقات کی جائے اور ذمہ دار افسران کے خلاف کارروائی کی جائے۔
واضح رہے کہ کولگام کے ایک تعلیم یافتہ نوجوان شعیب بشیر نے اپنے والد بشیر احمد کی تنخواہ واگزار نہ کیے جانے پر خودکشی کی اور اس سخت اقدام سے قبل ویڈیو بھی ریکارڈ کی اور خودکشی کے اقدام کی وجہ بھی بیان کی۔
احتجاج کر رہے اساتذہ کا کہنا ہے کہ پولیس کی سی آئی ڈی ونگ کی ویریفکیشن میں کلین چٹ ملنے کے باوجود بھی محکمہ تعلیم کے عہدیداران نے ان کی تنخواہ واگزار نہیں کی ہے۔
اکتوبر 2020 میں محکمہ کے کمشنر سیکریٹری اور گزشتہ ماہ جموں و کشمیر عدالت عالیہ نے محکمہ تعلیم کے ڈائریکٹر کو اُن اساتذہ کی تنخواہیں واگزار کرنے کا حکمنامہ جاری کیا جن کی تنخواہیں قریب ڈھائی برسوں سے بند ہیں۔ لیکن اس کے بعد بھی اساتذہ کو طویل عرصے سے تنخواہوں سے محروم رکھا جا رہا ہے۔
