TB elimination ایل جی انتطامیہ نے کشمیر میں ٹی بی کے خاتمے کو ممکن بنایا، ڈائریکٹر ہیلتھ

جنوبی کشمیر کے دو اضلاع اننت ناگ اور پلوامہ کو ٹی بی یعنی تپ دق سے پاک قرار دیا گیا ہے جبکہ سرینگرکو اس حوالے سے طلائی تمغہ حاصل ہوا ہے۔واضح رہے کہ ضلع بڈگام اس سے قبل ہی ٹی بی سے پاک قرار دیا گیا ہے۔

سرینگر: ڈائریکٹر ہیلتھ سروسز کشمیر ڈاکٹر مشتاق احمد راتھر نے وادی کشمیر کے مزید دو اضلاع کو ٹی بی سے پاک قرار دیے جانے پر خوشی کا اظہار کیا ہے۔ طبی عملے کی کوششوں کو سراہتے ہوئے انہوں نے ایل جی کی قیادت والی یوٹی حکومت کا جموں وکشمیر میں صحت کی دیکھ بھال کے نظام کو بہتر بنانے میں مسلسل تعاون پیش کرنے پر شکریہ ادا کیا۔ ڈائریکٹر ہیلتھ نے چیف سکریٹری ارون کمار مہتا اور سکریٹری صحت بھوپندر کمار سے ان کے فعال کردار اور مطلوبہ نتائج حاصل کرنے میں مسلسل رہنمائی کے لیے بھی شکریہ ادا کیا۔ جبکہ انہوں نے این ٹی ای پی سے وابستہ ہیلتھ ملازمین کے تعاون کو سراہا اور انہیں اس شاندار کامیابی پر مبارکباد پیش کی۔ انہوں نے کہا کہ ریاستی تپ دق افسر، چیف میڈیکل آفیسرز، ضلع تپ دق کے افسران، بلاک میڈیکل افسران اور محکمہ صحت کے عملے کی بھی ستائش کی۔