جموں وکشمیر میں 18 ماہ بعد 4 جی انٹرنیٹ سروسز کو بحال کردیا گیا ہے۔ گزشتہ روز جیسے ہی جموں و کشمیر انتظامیہ کے ترجمان روہت کنسل نے ٹویٹ کے ذریعہ 4 جی انٹرنیٹ کی بحالی کا اعلان کیا تو لوگوں میں خوشی کی لہر دوڑ گئی۔ سوشل میڈیا پر اس حوالے سے خوب چرچہ ہوئی۔ لوگوں نے اسے عید کے دن سے تعبیر کیا۔
دوسری جانب 4 جی انٹرنیٹ پر عائد پابندی ختم کیے جانے کے بعد تاجروں، طلباء اور آئی ٹی سیکٹر سے وابستہ لوگوں نے خوشی کا اظہار کیا ہے۔ طلباء فور جی خدمات سے اپنی زندگی کو بہتر بنانے کی بات کررہے ہیں۔
قابل ذکر ہے کہ جموں وکشمیر میں 5 اگست 2019 سے 4 جی انٹرنیٹ سروس پر پابندی عائد تھی اور اس میں ہر 15 دنوں کے بعد توسیع کی جارہی تھی۔ دوسری جانب تیز رفتار انٹرنیٹ پر عائد پابندی سے تاجر طبقہ، طلباء اور آئی ٹی سیکٹر سے وابستہ لوگوں کو بہت زیادہ دشواریوں کا سامنا کرنا پڑتا تھا۔ اس کے علاوہ دیگر لوگ بھی اس پابندی سے سخت نالاں تھے اور سیاسی جماعتوں سے لیکر اسکولی اداروں تک سبھی پابندی کو ہٹانے کا مطالبہ کر رہے تھے۔
