سرینگر: سرینگر کے برین نشاط علاقے سے تعلق رکھنے والی نیشنل کیڈٹ کور (این سی سی) کیڈٹ فضا شفیع کو امسال رکشا منتری کمنڈیشن کارڈ سے نوازا گیا فضا شفیع گرلز ہائیر سکنڈری اسکول نشاط میں دسویں جماعت میں زیر تعلیم ہے اور وہ جموں و کشمیر اور لداخ یونین ٹریٹری کی واحد طالبہ ہے جس کو جموں وکشمیر این سی سی گرلز یونٹ سرینگر کے تحت نمایاں کارکردگی انجام دینے پر اس اعلیٰ درجے کے اعزاز سے سرفراز کیا گیا۔ وزیر دفاع راجناتھ سنگھ نے 21 جنوری کو دہلی کینٹ میں نیشنل کیڈٹ کور (این سی سی) کے یوم جمہوریہ کیمپ کا دورہ کرنے کے دوران اس اعزاز سے نوازا۔ مذکورہ ہائیر سکنڈری کے پرنسپل غلام محی الدین شیخ اور دوسرے تدریسی و غیر تدریسی عملے نے اپنے اسکول کی اس ہونہار طالبہ کو اسکول اور جموں وکشمیر کا نام روشن کرنے پر مبارک باد پیش کی ہے۔
ہائیر سکنڈری کے ایک اسٹاف ممبر نے یو این آئی کے ساتھ بات کرتے ہوئے کہا کہ فضا شفیع ایک ہونہار این سی سی کیڈیٹ کے علاوہ کھیل کے دیگر میدانوں جیسے کھو کھو، بیڈ منٹن اور جھیل ڈل کی صفائی ستھرائی اور روڈ سیفٹی مہموں میں بھی حصہ لے کر اپنی صلاحیتوں کا لوہا منواتی ہے۔ انہوں نے کہا ’طالبہ تعلیم کے میدان میں بھی کسی سے پیچھے نہیں ہے بلکہ اس میں بھی اپنی ذہانت و ذکاوت کا سکہ بٹھا رہی ہے‘۔ ان کا کہنا تھا ’جب سے موجودہ پرنسپل نے عہدہ سنبھالا ہے تب سے ہماری ہائیر سکنڈری تمام میدانوں میں نمایاں کارنامے انجام دے رہی ہے‘۔
اسٹاف ممبر نے کہا 'موجودہ پرنسپل کی سربراہی میں ہائیر سکینڈری ہمہ جہت ترقی کر رہی ہے اور ہمارے طالب علم ہر میدان میں شاندار کارکردگیوں کا مظاہرہ کر رہے ہیں‘۔ انہوں نے کہا کہ قومی سطح پر مقابلہ کرکے اتنا بڑا اعزاز حاصل کرنا کوئی آسان کام نہیں ہے۔ انہوں نے کہا کہ فضہ شفیع ہر چلینج کو سنجیدگی سے لے کر اس کو سر کرنے کے لئے تندہی، لگن اور حد درجہ جوش و جذبے سے کام کرتی ہے۔ ان کا کہنا تھا کہ ہمارا اسکول فضہ جیسی دوسری طالبات کی حوصلہ افزائی کرنے کے لئے تیار ہے تاکہ وہ اپنی اپنی دلچسپیوں کے میدانوں میں کامیابی کی بلندیوں کو سر کر سکیں۔
یہ بھی پڑھیں: Kashmiri Artist Irtiqa Bazaz آرٹ کے احساس نے ارتقاء کو نیشنل ایوارڈ دلوایا
بتادیں کہ وزیر دفاع راج ناتھ سنگھ نے 21 جنوری کو دہلی کینٹ میں نیشنل کیڈٹ کور (این سی سی) کے یوم جمہوریہ کیمپ کا دورہ کیا اور کیڈٹس کو ان کی مثالی کارکردگی اور ڈیوٹی کے تئیں لگن کے لیے رکشا منتری پدکاور تعریفی کارڈ سے نوازا گیا۔ امسال رکشا منتری پدک سے شمال مشرقی ریجن ڈائریکٹوریٹ کے انڈر آفیسر ٹنگگیوچائل نریمے اور راجستھان ڈائریکٹوریٹ کے کیڈٹ اویناش جانگیر کو سر فراز کیا گیا۔ اس کیمپ میں ملک بھر سے تعلق رکھنے والے قریب2 کیڈس شرکت کر رہے ہیں۔ وزیر دفاع نے ان کیڈیس سے خطاب کرتے ہوئے انہیں نئی راہوں کی نشاندہی کرنے اور ملک کو تیز رفتاری کے ساتھ ترقی کی راہ پر آگے بڑھنے میں مدد کرنے کی تلقین کی۔
یو این آئی
