نجی اسکول معمول کے مطابق ہی ٹرانسپورٹ سہولیات دستیاب رکھیں گے

ضلع ترقیاتی کمشنر سرینگر ڈاکٹرشاہد اقبال چودھری نے کہا کہ تمام نجی اسکول بچوں کو لانے اور لے جانے کے لئے معمول کے مطابق ہی اپنی ٹرانسپورٹ سہولیات دستیاب رکھیں گے، جس کے لئے اب طلبا اور والدین کو پریشان ہونے کی کوئی ضرورت نہیں ہے۔

خیال رہے چند دن قبل پرائیویٹ اسکول ایسوسی ایشن کی جانب سے ایک بیان سامنے آیا تھا جس میں مالی مشکلات کا حوالہ دے کر کہا گیا تھا کہ والدین بچوں کے لیے اسکول لانے لیجانے کے لیے از خود ٹرانسپورٹ کا بدوبست کریں۔ جس کےبعد طلبا اور والدین میں تذبذب اور پریشانی پیدا ہوئی تھی۔

معاملے کی سنجیدگی کو دیکھتے ہوئے ضلع انتظامیہ سرینگر نے مسلے کو حل کرنے کے لئے تمام متعلقین کا بدھ کے روز ایک ہنگامی اجلاس منعقد کیا۔ جس میں ڈائریکٹر اسکول ایجوکیشن ، پرائیویٹ اسکول ایسوسی ایشن اور والدین کے علاوہ ضلع انتظامیہ کے اعلی افسران نے شرکت کی۔تمام متعلقین کے تجاویز اور مطالبات کا بغور جائزہ لیتے ہوئے اس بات پر متفقہ طور فیصلہ لیا گیا کہ بچوں کو پرائیوٹ اسکول انتظامیہ معمول کے مطابق ہی ٹرانسپورٹ سہولیات بہم رکھے گی۔اس موقع پر ضلع ترقیاتی کمشنر سرینگر نےپرائیویٹ ایسوسی ایشن کو بھی یقین دلایا کہ جائز مطالبات پر غور کرتے ہوئے بہت جلد معاملے کو سلجھایا جائے گا۔واضح رہے وادی کشمیر میں یکم مارچ سے قریب ایک برس بعد تمام اسکول درس وتدریس کی سرگرمیاں شروع کرنے جارہے ہیں ۔