جموں و کشمیر کے ضلع سرینگر میں نیشنل کانفرنس کے سینیئر رہنما اور رکن پارلیمنٹ محمد اکبر لون نے ڈی ڈی سی انتخابات کے پیش نظر کہا کہ نشنل کانفرنس ڈی ڈی سی انتخاب میں کامیابی حاصل کرے گی جس کے لیے ہم سخت محنت کررہے ہیں، اور ہمارا مقصد ہر حال میں جموں و کشمیر کی خصوصی حیثیت کو بحال کرانا ہے۔
انھوں نے بھارتیہ جنتا پارٹی کے ریاستی سیکریٹری رویندر رینا کے متنازعہ بیان پر کہا کہ 'وہ ایک پاگل آدمی ہے، جس کو سنجیدگی سے نہیں لینا چاہیے'۔ واضح رہے کہ رویندر رینا نے حال ہی میں گپکار اعلامیہ کے حوالے سے کہا تھا کہ مستقبل قریب میں تمام کشمیری رہنماؤں کو جے شری رام کہنا پڑے گا۔
انھوں نے 'اپنی پارٹی' کے صدر الطاف بخاری پر تنقید کرتے ہوئے کہا کہ اس شخص کا کوئی دین دھرم نہیں ہے، وہ ایک ایسے انسان ہیں جو کبھی بھی اور کسی وقت بھی اپنے فائدے کے لیے کسی بھی پارٹی میں جاسکتا ہے۔
