'فدائین حملہ پاکستان کے اشارے پر کیا گیا'

جموں و کشمیر کے گورنر ستیہ پال ملک نے اننت ناگ میں ہونے والے فدائین حملے کی مذمت کرتے ہوئے کہا کہ ' یہ حملہ پاکستان کے اشارے پر کیا گیا تھا اور اس کا ذمہ دار پوری طرح پاکستان ہے'۔

انہوں نے کہا کہ ہلاک شدہ سی آر پی ایف جوانوں کے گھروالوں کے دکھ میں برابر کے شریک ہیں۔

گذشتہ روز انت ناگ میں فدائین حملہ کیا گیا جس میں 5 جوان ہلاک ہوگئے تھے۔

آج شیرِ کشمیر انٹرنیشنل کنونشن سینٹر میں ایک تقریب کے بعد میڈیا سے بات کرتے ہوئے انہوں نے کہا کہ ہم کل کے فدائین حملے کی مزاحمت کرتے ہیں۔

اس دوران گورنر نے پاکستان پر الزام عاید کرتے ہوئے کہا کہ پاکستان کشمیر میں امن نہیں چاہتا اسی لیے وہ ایسے حملے یہاں کراتا ہے۔ انہوں نے کہا کہ ہم یہ سازش کامیاب نہیں ہونے دیں گے۔