این آئی اے نے منگل کو بتایا کہ 15 فروری کو جموں میں این آئی اے کی خصوصی عدالت میں خلیل احمد کیانی اور محمد ناظم کے خلاف چارج شیٹ دائر کی گئی ہے۔
کیانی اور ناظم پاکستان کے زیر انتظام کشمیر میں خورشيدآباد تحصیل کے رہنے والے ہیں۔ دونوں کو جموں و کشمیر کے بارہمولہ ضلع کے گلمرگ سیکٹر میں کنٹرول لائن کے قریب 700 میٹر اندر نیل کنٹھ نالے کے پاس سے گرفتار کیا گیا تھا۔
بھارتی فوج نے گزشتہ برس 21 اگست کو ان کے پاس سے بڑی مقدار میں ہتھیار، گولہ بارود، دستی بم، دھماکہ خیز مواد اور ڈیٹونیٹر، طاقتور دھماکہ خیز مواد، پاکستان میں تیار ادویات اور کھانے پینے کی اشیا برآمد کی تھی۔
این آئی اے نے معاملے کی جانچ کے دوران انکشاف کیا ہے کہ پی او کے کیانی اور ناظم لشکر طیبہ اور پاکستانی فوج کے ساتھ رابطے میں تھے۔
جانچ ایجنسی نے کہا کہ 'دونوں ہندوستان میں عسکری سرگرمیوں کو انجام دینے کے لیے پاکستانی عسکریت پسندوں کے استعمال کے لیے بھارتی علاقے کے جنگل کے علاقے میں ہتھیار، گولہ بارود اور دھماکہ خیز مواد لانے کے کام میں ملوث تھے'۔
این آئی اے نے کہا کہ 'معاملے کی جانچ جاری ہے۔'
