جموں و کشمیر کی سابق وزیر اعلیٰ اور پیپلز ڈیموکریٹک پارٹی کی صدر محبوبہ مفتی کی دختر التجا مفتی عالمی وبا کورونا وائرس سے مثبت پائی گئی ہے۔
محبوبہ مفتی نے سماجی رابطہ کی ویب سائٹ ٹویٹر پر اس بات کی تصدیق کرتے ہوئے کہا: ’’میری چھوٹی دختر التجا مفتی آج کورونا وائرس سے مثبت پائی گئی ہیں۔‘‘
اُن کا مزید کہنا ہے کہ ’’ڈاکٹروں کی ہدایت پر عمل کرتے ہوئے وہ سبھی احتیاطی تدبیر پر عمل کر رہی ہیں اور اس وقت انہوں نے خود کو علیحدہ رکھا ہوا ہے۔‘‘
واضح رہے کہ چند روز قبل رکن پارلیمان اور سابق وزیر اعلیٰ ڈاکٹر فاروق عبداللہ اور اُن کے فرزند عمر عبداللہ بھی عالمی وبا سے متاثر پائے گئے۔
دیگر ریاستوں کی طرح جموں و کشمیر میں بھی عالمی وبا کورونا وائرس کے مثبت معاملات میں تیزی سے اضافہ رہا ہے، جبکہ اموات کی تعداد میں بھی کئی کمی واقع نہیں ہو رہی ہے۔
