بی جے پی کے سینیئر لیڈر اور سابق وزیر منوج سنہا کو مرکز کی مودی حکومت نے ایک حیران کن فیصلے کے تحت گریش چندر مرمو کی جگہ جموں و کشمیر کا نیا لیفٹیننٹ گورنر تعینات کیا ہے۔
نئے ایل جی آج حلف لیں گے، بدھ کو اچانک گریش چندر مرمو نے اپنے عہدے سے استعفیٰ دے کر سیاسی اور عوامی حلقوں کو حیران کرکے رکھ دیا تھا۔ مرمو اس عہدے پر نو ماہ فائز رہے۔
انہوں نے گزشتہ برس 31 اکتوبر کو جموں و کشمیر کے پہلے ایل جی کے بطور حلف لیا تھا۔
مرمو گزشتہ 9 ماہ سے اس عہدے پر فائز رہے جس دوران سیول سیکریٹریٹ میں بیوروکریسی دو خیموں میں منقسم ہوگئی، جہاں بیشتر افسران چیف سیکریٹری بی وی آر سبرامانیم کے خیمے میں تھے۔
یہ بھی پڑھیں۔۔۔
جموں و کشمیر کے سابق ایل جی کو سی اے جی بنایا گیا
ذرائع کے مطابق سنہا جموں و کشمیر کی منجمد سیاست اور سرکاری امور کو بحال کرنے کی کوشش کریں گے۔
منوج سنہا کی جموں و کشمیر کے دوسرے لیفٹیننٹ گورنر کے طور پر ہوئی تعیناتی کو ماہرین ایک بڑا سیاسی قدم بھی مان رہے ہیں کیونکہ اکتوبر کے مہینے میں بہار میں ریاستی انتخابات متوقع ہیں جہاں ہمیشہ سے بھومیہار سماج کا خاصا اثر رہا ہے اور سنہا بھی بھومیہار ہیں۔
سنہ 2017 میں جب بھارتیہ جنتا پارٹی نے اترپردیش کے ریاستی انتخابات میں بھاری اکثریت حاصل کی تھی تب منوج سنہا کا نام وزیر اعلیٰ کے عہدے کے لیے بھی سامنے آیا تھا۔ ان کے انتخابی حلقہ میں انہیں وکاس پُروش کے نام سے بھی جانا جاتا ہے۔
منوج سنہا آئی آئی ٹی بی ایچ یو کے سابق طالب علم ہونے کے ساتھ ساتھ وزیر داخلہ امت شاہ اور وزیر اعظم نریندر مودی کے قریبی مانے جاتے ہیں۔
