لیفٹیننٹ گورنر منوج سنہا نے سری نگر اسمارٹ سٹی پروجیکٹ پر پیشرفت کا جائزہ لینے کے لئے ایک اجلاس کی صدارت کی جس دوران لیفٹیننٹ گورنر نے منصوبے کو مزید پائیدار اور ماحول دوست بنانے کے طریقوں پر تبادلہ خیال کیا۔
لیفٹیننٹ گورنر نے پائیدار ماحول اور شہری بنیادی ڈھانچے کی ترقی کے علاوہ دریائے جہلم کی جمالیاتی قدر کی بحالی کے لئے جامع اقدامات اٹھانے کا حکم دیا۔ انہوں نے مقررہ وقت میں منصوبوں کی تکمیل کے لئے مخصوص ہدایات منظور کیں۔
لیفٹیننٹ گورنر نے اسمارٹ سٹی پروجیکٹس کے متعلقہ افسران سے کہا کہ وہ جموں اور سری نگر کو جدید، پائیدار اور معاشی طور پر متحرک شہروں میں تبدیل کرنے کے لئے تمام امکانات تلاش کریں۔
انہوں نے بین شعبہ جاتی کوآرڈینیشن برقرار رکھنے پر زور دیا اور افسران سے کہا کہ وہ اسمارٹ سٹی کے مختلف اقدامات کو موثر طریقے سے نافذ کریں۔
اس میٹنگ میں سرینگر اسمارٹ سٹی منصوبے کے مختلف دیگر پہلوؤں پر تبادلہ خیال کیا گیا جن میں دریاؤں، جھیلوں، ندی نالوں کا تحفظ، نقل و حرکت، کھیل اور نوجوانوں کے تفریحی مقامات شامل ہیں۔
