سرینگر: لیفٹیننٹ گورنر منوج سنہا نے بدھ کو سرینگر راج بھون میں پلوامہ کے پیرا ایتھلیٹ کھلاڑی عرفان احمد میر سے ملاقات کی۔ راج بھون میں تعینات ایک افسر کا کہنا تھا کہ "بات چیت کے دوران عرفان میر نے لیفٹیننٹ گورنر کے ساتھ جموں و کشمیر میں مخصوص کھلاڑیوں کے لیے کھیلوں کی سہولیات کو فروغ دینے اور ترقی سے متعلق مختلف امور پر تبادلہ خیال کیا۔"Para Athlete Irfan Ahmad Mir Meets LG
افسر کا کہنا تھا کہ "نابینا افراد کے لیے بین الاقوامی کرکٹ سیریز میں بھارت کی نمائندگی کرنے والے پیرا ایتھلیٹ کے ہمت اور عزم کی تعریف کرتے ہوئے لیفٹیننٹ گورنر نے انہیں یوتھ سروسز اور کھیل کے محکمے کے ذریعے ہر ممکن تعاون کا یقین دلایا۔"
اُن کا مزید کہنا تھا کہ" یوٹی انتظامیہ تمام نوجوانوں خاص طور پر معذور کھلاڑیوں کو اسٹیڈیم، تربیت یافتہ کوچ، نمائش کے دورے وغیرہ کے مقابلے میں بہترین کھیلوں کا ماحولیاتی نظام فراہم کرنے کے لیے پرعزم ہے۔ لیفٹیننٹ گورنر نے عرفان میر کو ان کی مستقبل کی کوششوں میں کامیابی کے لیے نیک خواہشات کا اظہار بھی کیا۔"
قابل ذکر ہے کہ عرفان میر بصارت سے محروم ہونے کے باوجود سات دیگر خصوصی طور پر معذور افراد کی ٹیم کے ساتھ سیاچن گلیشیئر پر چڑھے تھے اور ان کا تذکرہ وزیر اعظم نریندر مودی نے اپنے "من کی بات" ریڈیو پروگرام میں کی تھی۔
