لیفٹیننٹ گورنر نے بابر قادری کے اہل خانہ سے ملاقات کی

جموں و کشمیر کے لیفٹیننٹ گورنر منوج سنہا نے آج ہلاک شدہ وکیل بابر قادری کی سرینگر رہائش گاہ پر جاکر ان کے لواحقین سے تعزیت کا اظہار کیا۔

انتظامیہ کے ایک سینیئر افسر نے ای ٹی وی بھارت کو بتایا کہ 'لیفٹیننٹ گورنر منوج سنہا نے آج بابر قادری کے والد محمد یاسین قادری اور ان کے بھائی ظفر قادری سے سرینگر کے حول علاقے میں واقع ان کی رہائش گاہ پر ملاقات کی۔'

انہوں نے کہا کہ 'ملاقات کے دوران لیفٹیننٹ گورنر منوج سنہا نے سوگوار کنبے کو انتظامیہ کی جانب سے ہر ممکن مدد فراہم کرنے کی یقین دہانی کرائی۔ ایل جی کے ہمراہ ڈائریکٹر جنرل آف پولیس دلباغ سنگھ، آئی جی پی کشمیر وجے کمار اور ایس ایس پی سرینگر ڈاکٹر حسین مغل بھی تھے۔

وہیں دوسری جانب بابر قادری کے والد نے دعوی کیا ہے کہ انہیں پولیس کی جانچ پر کوئی اعتبار نہیں۔ وہ ان کے بیٹے کے قاتلوں کو گرفتار کر سکتے تھے تاہم ایسا نہیں ہوا۔

واضح رہے کہ گزشتہ ماہ کی 24 تاریخ کو وادی کے نامور وکیل بابر قادری کو نامعلوم بندوق برداروں نے ان کی رہائش گاہ پر گولی مار کے موت کے گھاٹ اتار دیا تھا۔