جہاں بالی ووڈ اداکارہ پرینکا چوپڑا نے سماجی رابطہ کی ویب سائٹ انسٹاگرام پر گانا گاتے ہوئے اپنے ہاتھ دھونے کا ویڈیو اپلوڈ کیا وہیں ہالی وڈ کے جانے مانے اداکار ہیوجیک مین نے اپنے ویڈیو کے دوران پانی ضائع نہ کرنے کی گزارش بھی کی۔
وادی کشمیر میں بھی اس چیلنج کے طرف کافی لوگ راغب ہو رہے ہیں۔
کشمیر کے جانے مانے فٹبال کوچ طارق احمد مدنی نے بھی اس چیلنج کے ذریعے وادی کے کھلاڑیوں اور عوام میں کورونا وائرس سے بچنے کی احتیاطی تدابیر پر عمل کرنے کی ایک انوکھی پہل کی۔
سماجی رابطے کی ویب سائٹ فیس بک پر دو منٹ 41 سیکنڈ کی ویڈیو میں انہوں نے اپنے انداز میں بیداری پیدا کرنے کی کوشش کی۔
ویڈیو میں وہ کہہ رہے ہیں کہ ’’ آج ہم فٹبال پیروں سے نہیں ہاتھوں سے کھیلیں گے اور مخالف ٹیم ہے کورونا وائرس۔ اس وائرس پر جیت بار بار ہاتھ دھونے سے ہی ممکن ہے۔‘‘
طارق مدنی وادی کشمیر کے مشہور فٹبال کھلاڑی ہونے کے ساتھ ساتھ کوچ کے فرائض بھی انجام دیتے ہیں۔ اس کے علاوہ وہ ضلع فٹبال اسوسیشن سرینگر کے سیکریٹری بھی ہیں۔
ای ٹی وی بھارت سے بات کرتے ہوئے ان کا کہنا تھا کہ ’’اس مہم میں شامل ہونے کا مقصد عوام کو کثرت سے ہاتھ دھونے کی ہدایت دینا ہے۔ اس کے مزید وادی کے کھلاڑیوں کو اس چیلنج میں شامل کرنا بھی۔ اسی لیے میں نے اپنی ویڈیو میں بھی کہا کہ اچھے اور بہتر طریقے سے ہاتھ دھونے والے کھلاڑیوں کو انعامات سے نوازا بھی جائے گا۔‘‘
واضح رہے کہ کورونا وائرس کے پھیلاؤ کے پیش نظر ورلڈ ہیلتھ آرگنائزیشن نے سماجی رابطہ کی ویب سائٹ پر ’’سیف ہینڈس‘‘ (Safe Hands) مسابقہ شروع کیا۔ اس چلینج میں حصہ لینے والے افراد کو صابن سے یا سینی ٹائیزر سے ہاتھ دھوتے ہوئے اپنا ویڈیو فیس بک، ٹویٹر، انسٹاگرام یا پھر کسی اور سماجی رابطہ کی ویب سائٹ پر اپلوڈ کر عوام میں بیداری پیدا کرنا ہے۔
