اپنی پارٹی صدر سید محمد الطاف بخاری نے ڈی پی ایس سرینگر کے عریب عمران کو کالج بورڈ انڈیا گلوبل الائنس انی شیٹیو کی طرف سے منعقدہ سیٹ امتحان میں شاندار کارکردگی کا مظاہرہ کرنے پر مبارک باد پیش کی ہے۔
بخاری نے کہا کہ جموں و کشمیر کے طلباء میں صلاحیتیں کوٹ کوٹ کر بھری ہیں اور وہ محنت و لگن سے کسی بھی شعبہ میں مہارت حاصل کرسکتے ہیں۔
انہوں نے کہا کہ وقت کی اہم ضرورت ہے کہ ایسے مواقع اور پلیٹ فارم مہیا کرائے جائیں جن سے ہمارے طلباء اپنے اندر چھپی صلاحیتوں کا مظاہرہ کرسکیں۔
انہوں نے تہنیتی پیغام میں مزید کہا کہ 'میں عریب عمران کو، اُس کے والدین اور اسکول انتظامیہ و فیکلٹی ممبران کو سیٹ امتحان میں شاندار کارکردگی کے ذریعہ جموں وکشمیر کا نام روشن کرنے پر مبارک باد پیش کرتا ہوں، مجھے یقین ہے کہ اگر ہمارے نوجوانوں کو مواقع فراہم کئے جائیں تو پھر آسمان ہی اُن کے کارناموں کی حد ہوگا'۔
