ایک اہم فیصلے کے تحت جموں وکشمیر انتظامیہ نے این ایچ ایم کے تحت کام کرنے والے ملازمین کی تنخواہوں میں خاطر خواہ اضافے کو منظور دی ہے۔
حکام کے مطابق یہ فیصلہ کووڈ 19 کے پھیلائو کو روکنے میں انتھک محنت کر رہے ملازمین کی حوصلہ افزائی کے لیے کیا گیا ہے۔
وزارت صحت و خاندانی بہبود کے مطابق این ایچ ایم ملازمین کی تنخواہوں میں پہلی مرتبہ سالانہ انکریمنٹ کے طور پر اضافہ کیا گیا ہے۔ اس ضمن میں انفرادی اضافے کی صحیح رقم کو فائنانشل کمشنر این ایچ ایم محکمے کی سربراہی میں اسٹیٹ ہیلتھ سوسائٹی کی ایگزیکٹو کمیٹی کو بھی مطلع کیا گیا ہے۔
کورونا وائرس کی وبائی بیماری کے موجودہ دور میں این ایچ ایم ملازمین سمیت محکمہ صحت اور میڈیکل ایجوکیشن کورونا کے پھیلاؤ کی روکتھام کے لیے موثر اور بے لوث خدمات انجام دے رہے ہیں۔
واضح رہے کہ جموں وکشمیر انتظامیہ نے ملازم دوستانہ اقدام کے تحت حال ہی میں مالی سال 2020-21 کے لئے قومی مشن کے تحت کام کر رہے ملازمین کے حق میں ’لایلٹی بونس‘ دینے کا اعلان بھی کیا تھا۔
