سرینگر: انجمن اوقاف جامع مسجد سرینگر کی جانب سے اعلان کیا گیا کہ امسال بھی کشمیر کے عازمین حج کی عملی تربیت کے لیے انجمن کے زیر اہتمام اسلامیہ اسکول راجوری کدل کے آڈیٹوریم میں رواں ماہ کی 30 مئی بروز منگل دن کے گیارہ بجے ایک حج تربیتی پروگرام کا اہتمام کیا گیا ہے۔ اس پروگرام میں کشمیر کے معروف عالم دین اور سرکردہ مفتی مفتی نذیر احمد القاسمی شیخ الحدیث دارالعلوم رحیمیہ بانڈی پورہ عازمین کو حج کے حوالے سے عملی ترتیت فراہم کریں گے۔اس دوران عازمین کے لیے مناسک حج کی تفصیلات بھی پیش کی جائیں گی۔ شہر سرینگر کے عازمین حج سے خصوصاً گزارش کی گئی ہے کہ وہ اس دینی پروگرام سے استفادہ حاصل کریں۔
ادھر انجمن اوقاف نے سربراہ انجمن میراعظ ڈاکٹر مولوی محمد عمر فاروق کی مسلسل غیر قانونی اور غیر اخلاقی چار سالہ نظر بندی کے خلاف برہمی کا اظہار کرتے ہوئے اس کے خلاف سخت احتجاج کیا ہے۔جاری کردہ اپنے ایک بیان میں انجمن نے کہا کہ آج 196 واں جمعتہ المبارک کو بھی میرواعظ لگاتار نظر بندی کے سبب نہ تو نماز جمعہ جیسا اہم فریضہ اور نہ ہی اپنی منصبی ذمہ داریاں ادا کرسکے۔
مزید پڑھیں: میرواعظ محمد عمر فاروق کی تقریباً 4 برس طویل نظر بندی قابل افسوس۔انجمن اوقاف
بیان میں کہا گیا کہ میرواعظ کی نظر بندی اور موصوف پر قدغنوں کے سبب شہر و گام سے نماز جمعہ کیلئے آنے والے ہزاروں مرد و خواتین اور نوجوانوں کو مایوس لوٹنا پڑا کیونکہ وہ اپنے محبوب رہنما کے وعظ و تبلیغ کی مجلس اور پند و نصائح سے محروم رہے۔
