'آئین کے مطابق حکومت گفت و شنید کے لیے تیار ہے'

اگر علیحدگی پسند رہنما گفت و شنید کے لیے تیار ہیں تو یہ ایک خوش آئند بات ہے۔ بھارتی آئین کے تحت جو بھی بات کرے گا مرکز کی مودی حکومت اس کے لیے ہمیشہ تیار تھی اور تیار ہے۔

بھارتیہ جنتا پارٹی کے قومی نائب صدر اویناش رائے کھنہ نے سرینگر میں میڈیا کے ساتھ بات چیت کے دوران ایک سوال کے جواب میں یہ باتیں کہیں۔

انہوں نے کہا کہ 'مرکزی حکومت نے جس طرح سے ریاست جموں و کشمیر کے لوگوں کے سامنے تمام حقائق پیش کیے ہیں، اس کا ہی یہ ثمرہ ہے کہ جو لوگ کل تک گفت و شنید کرنے سے دور بھاگتے تھے۔ آج وہی اپنے آپ میں لچک پیدا کر رہے ہیں جو ریاست کے مستقبل کے لیے نیک شگون ہے۔'

اویناش رائے کھنہ نے کہا کہ 'مرکز جموں و کشمیر کو ترقی پذیر اور مثالی ریاست بنانا چاہتا ہے اور یہ تب ہی ممکن ہے جب ریاست میں امن و امان قائم رہے۔'

قومی نائب صدر نے یہ بھی واضح کیا کہ 'جو بھی ریاست کے امن و امان اور ترقی کے لیے رکاوٹیں پیدا کر رہے ہیں، ان کے ساتھ قانونی طریقے سے نمٹا جائے گا۔'