سرینگر: حکام کی جانب سے نماز جمعہ پر پابندی کی صورت میں جامع مسجد کا مرکزی دورازاہ تالہ بند کر دیا گیا تھا۔ ایسے میں جامع مسجد کو ایک پھر سے بند کرنے سے ان لوگوں کو بغیر نماز ادا کیے واپس جانا پڑا جو نماز کی غرض سے جامع مسجد پہنچے تھے۔Friday Prayer Barred in Jamia Masjid Srinagar
اس بیچ انجمن اوقاف جامع مسجد سرینگر نے اپنے ایک بیان میں کہا کہ آج جب کہ دنیا بھر کے لاکھوں حجاج کرام اور زائرین مکہ مکرمہ کے میدان عرفات میں اللہ کے حضور سربسجود ہیں تو کشمیر میں جمعتہ المبارک کے موقع پر مسلمانان کشمیر کو حکام کی جانب سے ایک بار پھر مرکزی جامع مسجد سرینگر میں نماز جمعہ ادا کرنے کی اجازت نہ دیا جانا، حد درجہ افسوسناک اور قابل مذمت ہے۔
انجمن نے کہا کہ آج علی الصبح مجسٹریٹ اور پولیس کے اعلیٰ حکام نے جامع مسجد آکر انجمن کے عہدیداروں اور عملہ کو آگاہ کیا کہ آج جامع مسجد میں نماز جمعہ ادا کرنے کی اجازت نہیں ہے۔ بیان میں انجمن نے بار بار کشمیر کی سب سے بڑی عبادت گاہ میں مسلمانوں کو نماز جمعہ جیسے اہم دینی فریضے کی ادائیگی سے روکنے کے عمل کو آمرانہ اور غیر اسلامی عمل قرار دیا۔
مزید پڑھیں:
گذشتہ کل متحدہ مجلس علما کے ہنگامی اجلاس میں پاس شدہ قرارداد کی عوامی تائید کے لیے وادی بھر کی بڑی بڑی مساجد، خانقاہوں، امام باڑوں اور آستانوں میں علما، خطباء اور ائمہ حضرات نے مرکزی جامع مسجد کو ایک بار پھر حکمرانوں کی جانب سے نماز جمعہ کے لیے بند کرانے کی پالیسی اور مجلس کے سرپرست اعلیٰ اور کشمیر کے سب سے بڑے مذہبی رہنما میرواعظ ڈاکٹر مولوی محمد عمر فاروق مسلسل تین سالہ نظر بندی کے خلاف صدائے احتجاج بلند کیا اور عید الاضحی اور قربانی کے بابرکت ایام کے پیش نظر جناب موصوف کی فوری اور غیر مشروط رہائی کا مطالبہ کیا تاکہ میر واعظ کشمیر اپنی روایتی منصبی ذمہ داریاں ادا کرسکیں۔
واضح رہے تاریخی جامع مسجد سرینگر میں گذشتہ ہفتے نماز جمعہ ادا کرنے کی اجازت دی گئی تھی، جس پر عوام نے خوشی اور اطمینان کا اظہار کیا تھا۔
