غیر ملکی سفارتکاروں کا دورہ کشمیر: سرینگر میں دکانیں بند

بدھ کو بھی لال چوک سمیت شہر خاص کے بیشتر بازاروں میں دکانیں بند رہیں تاہم نجی و پبلک گاڑیوں کی کچھ حد تک نقل وحمل جاری رہی۔

غیر ملکی سفارتکاروں کے وادی کشمیر کے دورے کے پیش نظر جمعرات کو دارالحکومت سرینگر میں دکانداروں نے دوسرے روز بھی غیر اعلانیہ ہڑتال کی، لیکن آمد روفت معمول کے مطابق رواں ہے-

سرینگر کے لالچوک اور ملحقہ بازاروں میں دکانین بند ہیں جبکہ نجی و پبلک ٹرانسپورٹ معمول کے مطابق چل رہا ہے- دکانداروں کا کہنا ہے کہ جب تک سفارتکار سرینگر میں مقیم ہیں تب تک وہ دکانین بند رکھیں گے- قابل ذکر ہے کہ سفارتکاروں کا سرینگر کا دورہ آج دوپہر سے قبل اختتام ہو رہا ہے جب وہ جموں کی طرف روانہ ہوں گے جہاں وہ لیفٹیننٹ گورنر منوج سنہا کے علاوہ دیگر وفود سے ملاقات کریں گے-

بدھ کو بھی لال چوک سمیت شہر خاص کے بیشتر بازاروں میں دکانیں بند رہیں تاہم نجی و پبلک گاڑیوں کی کچھ حد تک نقل وحمل جاری رہی۔

سفارتکاروں کے جموں وکشمیر دورے سے چند روز قبل سرینگر میں چند مقامات پر سی آر پی ایف کے بنکر بھی ہٹا دئے گئے تھے تاہم سی آر پی ایف اہلکاروں کے مطابق بنکروں کو ہٹانا حفاظتی اقدامات کے پیش نظر ایک روٹین کام ہے اس کا وفد کے دورہ کشمیر سے کوئی تعلق نہیں۔

غور طلب ہے کہ مرکزی وزارت خارجہ کی جانب سے منعقد کیا جانے والا یہ دورہ اس وقت کیا جا رہا ہے جب مرکزی سرکار نے چند ماہ قبل یہاں پہلی مرتبہ ضلع ترقیاتی انتخابات منعقد کروائے اور مین اسٹریم سیاسی سرگرمیاں بھی بحال ہونے دیں، وہیں چند روز قبل ہی تیز رفتار انٹرنیٹ (4G) پر 550 دنوں سے زیادہ عرصے کے بعد پابندی ہٹا دی گئی۔