نیشنل کانفرنس کے صدر ڈاکٹر فاروق عبداللہ اور نائب صدر عمر عبداللہ نے ضلع کشتواڑ کے دچھن میں بادل پھٹنے اور سیلابی صورتحال میں درجنوں افراد کے لاپتہ ہونے اور متعدد ہلاکت پر غم کا اظہار کیا ہے۔
دونوں لیڈران نے اس دلدوز اور دلخراش واقعہ میں لقمہ اجل بنے افراد کے سوگواران کے ساتھ تعزیت کا اظہار کیا اور اُن کے لیے صبر کی دعا کی۔
فاروق عبداللہ نے انتظامیہ سے اپیل کی کہ راحت رسانی کام میں تیزی لائی جائے تاکہ لاپتہ افراد کو جلد از جلد تلاش کیا جاسکے۔
انہوں نے حکومت پر زور دیا کہ وہ ہلاک ہونے والوں کے اہل خانہ کو معاوضہ دے نیز ان کی بازآباد کاری کے لیے فوری اقدامات کئے جائیں۔
انہوں نے کہا کہ سیلابی پانی سے منقطع ہوئے روڈ رابطوں کی فوری مرمت کی جائے کیونکہ سڑک جاری ہونے سے ہی ریلیف اور راحت رسانی کے اقدامات ممکن ہوسکتے ہیں۔
