ڈاکٹروں کے عالم دن کی نسبت سے ڈاکٹرس ایسوسی ایشن کشمیر کے صدر نے کورونا کی وبائی بیماری کے خلاف جنگ میں ڈاکٹروں کے کردار کی تعریف کرتے ہوئے کہا: ’’کورونا کے دور میں ڈاکٹروں کی انتھتک خدمات اور بے مثال شراکت داری کو کبھی بھی فراموش نہیں کیا جا سکتا ہے۔‘‘
انہوں نے کہا کہ جب لوگ اس مہلک وائرس میں مبتلا مریضوں سے خود کو الگ تھلگ کر رہے تھے اور ان سے دور بھاگ رہے تھے تو اُس صورت میں ڈاکٹروں نے ہی مریضوں کے قریب جاکر ان کا علاج کیا اور خود مناسب کھانے اور آرام کے بغیر مریضوں کی دیکھ بھال اور بیماروں کے رشتہ داروں کو تسلی دیتے رہے۔
ایسوسی ایشن نے اپنے ایک بیان میں کہا کہ ’’ڈاکٹر صدی کی سب سے بڑی لڑائی لڑ رہے ہیں۔ کووڈ 19 وبائی بیماری ڈاکٹروں پر بھی سخت ہے کیونکہ جان لیوا وائرس کے دوران اب تک کئی ساتھیوں نے اپنی جانیں گنوائیں ہیں، لیکن اس کے باوجود بھی ڈاکٹروں نے بحران کی گھڑی میں اپنا کام بخوبی انجام دیا اور انسانیت کی خدمت کرتے آ رہے ہیں۔‘‘
مزید پڑھیں؛ وزیر اعظم اور وزیر داخلہ نے ڈاکٹروں کو مبارکباد پیش کی
ڈاکٹرس ایسوسی ایشن کے ترجمان نے مزید کہا کہ کسی بھی صحت کے بحران سے نمٹنا ڈاکٹروں کے لیے بھی انتہائی دشوار گزار ہوتا ہے اور ڈاکٹروں نے اس کام کو مضبوط ارادے سے عملی میدان میں بخوبی کر کے دکھایا جو بظاہر نا ممکن لگ رہا تھا۔
واضح رہے کہ ہر برس یکم جولائی کو ڈاکڑوں کا عالمی دن منایا جاتا ہے اس دن ڈاکٹروں کی خدمات اور ان کی شراکت داری کو یاد کیا جاتا ہے۔ رواں برس کورونا وائرس کے بحران کے سبب اس دن کی اہمیت اور زیادہ بڑھ گئی ہے کیونکہ ڈاکٹروں اور دیگر طبی عملے نے کورونا وائرس کے وبائی مرض کے خلاف دنیا بھر میں بہترین کام انجام دیا ہے۔
