کشمیر کے دس اضلاع میں شوپیاں، کولگام اور بارہمولہ کے باغبانوں کو سب سے زیادہ نقصان اٹھانا پڑا ہے جہاں 38 فی صد باغوں کو نقصان ہوا ہے۔
گاندربل، پلوامہ، اننت ناگ، بڈگام، کپوارہ اور بانڈی پورہ میں 35 فی صد جبکہ سرینگر میں 22 فی صد باغات برف باری سے متاثر ہوئے ہیں۔
ای ٹی وی بھارت سے بات کرتے ہوئے کشمیر میں محکمہ باغبانی کے ڈائریکٹر اعجاز احمد بٹ نے برف باری سے ہوئے نقصان کی تفصیل فراہم کرتے ہوئے کہا کہ کشمیرمیں 210698 ہیکٹئر اراضی زمین پر سیب کی کاشتکاری کی جا رہی ہے جس میں 154972 ہیکٹئر اراضی برف باری سے بری طرح اثر انداز ہوئی ہے۔
انہوں نے کہا کہ محکمہ باغبانی اور محکمہ مال مل کر اس پورے نقصان کا بھر پور طریقے سےتخمینہ لگا کر کاشتکاروں کو معاوضہ فراہم کریں گے۔
انہوں نے کہا کہ معاوضے کے علاوہ کاشتکاروں کو باغبانی کا سامان، پودے وغیرہ فراہم کیے جائیں گے۔
ڈائریکٹر ہارٹیکلچر نے نے مزید کہا کہ سرکار ایس ڈی ار ایف کے زمرے میں حالیہ برف باری کو قدرتی آفت قرار دے گی جس سے کاشتکاروں کی معاونت بھی کی جائے گی۔
