جنوبی کشمیر کے ضلع اننت ناگ کے علاقے آکورا مٹن کی خاتون سری نگر کے ایس ایم ایچ ایس اسپتال میں زندگی اور موت کی جنگ لڑرہی ہے۔
اطلاعات کے مطابق جمعرات کی صبح 32 سالہ خاتون کو نیم مردہ حالت میں اسپتال میں علاج و معالجہ کے لئے پہنچایا گیا۔ ذرائع کے مطابق مذکورہ خاتون کے سسرال والوں پر الزام ہے کہ انہوں نے اسے جلانے کی کوشش کی۔ ڈاکٹروں نے اسے خصوصی علاج کے لئے ایس ایم ایچ ایس اسپتال ریفر کردیا۔
واضح رہے کہ متاثرہ خاتون عشمقام علاقے کی رہنے والی ہے اور ان کی شادی مٹن آکورہ میں آج سے 14 سال پہلے ہوئی تھی۔
متاثرہ کے لواحقین کے مطابق خاتون کی حالت روز بروز ابتر ہوتی جا رہی ہے۔ متاثرہ کے اہل خانہ نے اس کے سسرال والوں پر الزام لگایا ہے کہ اسے جنوبی کشمیر کے اننت ناگ کے علاقے آکورا مٹن واقع اپنے گھر میں جلایا گیا تھا۔
جمعرات کی صبح متاثرہ کے بھائی نے بتایا کہ اس کی بہن 90 فیصد سے زیادہ جھلس چکی ہے اور اسے علاج و معالجہ کے لئے اسپتال منتقل کیا گیا۔
ڈاکٹروں کے مطابق اس کی حالت تشویشناک ہے۔ انہوں نے مزید کہا کہ متاثرہ لڑکی پہلے ہی پولیس کو یہ بیان دے چکی ہے کہ اسے مبینہ طور پر اس کے شوہر اور سسرال والوں نے جلایا تھا۔ تاہم، ایک ویڈیو سوشل میڈیا پر وائرل ہو چکا ہے جس میں متاثرہ لڑکی کا الزام ہے کہ اسے مبینہ طور پر اس کے شوہر اور سسرال والوں نے جلایا ہے۔
یہ بھی پڑھیں: سسرال والوں پر لڑکی کو جلانے کا الزام
پولیس ذرائع نے کہا کہ ہم نے ان کے شوہر، ساس اور سسر کو پوچھ گچھ کے لئے گرفتار کیا ہے، انہوں نے مزید کہا کہ تفتیش جاری ہے۔ متعلقہ دفعات کے تحت مقدمہ درج کر لیا گیا ہے اور تفتیش جاری ہے۔
دریں اثنا، متاثرہ لڑکی کے والد نے کہا کہ 'میں انصاف چاہتا ہوں، میں چاہتا ہوں کہ ملزمین کو جلد سے جلد سزا دی جائے اور کسی دوسری بیٹی کو میری بیٹی کی طرح تکلیف کا سامنا نہ کرنا پڑے۔'
