ڈپٹی کمشنر سرینگر اعجاز اسد نے سماجی رابط گاہ ٹویٹر کے ذریعے معلومات فراہم کرتے ہوئے کہا کہ میرک آباد شالیمار، حیدر کالونی، کل خان گلی اپر صورہ بژھ پورہ، فردوس کالونی زڈی بل اور غزالی آباد لین نمبر ون ایچ ایم ٹی کے ساتھ ساتھ شاہ انور کالونی لین نمبر ٹو بٹہ مالو کو مائیکرو کنٹینمنٹ زون قرار دیا گیا ہے۔
ڈپٹی کمشنر نے بتایا کہ ان علاقوں کی ناکہ بندی کرکے ہر طرح کے داخلے پر پابندی عائد کر دی گئی ہے۔ انہوں نے کہا کہ 50 اور 75 میٹر والے علاقے میں پابندی کا نفاذ عائد رہے گا۔
ذرائع نے بتایا کہ بندش والے زون قرار دئے گئے علاقوں کی سخت نگرانی کرنے اور لوگوں کی نقل وحرکت کو مسدود کرنے کی خاطر سخت احکامات صادر کئے گئے ہیں۔
ان علاقوں میں لاؤڈ اسپیکروں کے ذریعے اعلانات کئے جا رہے ہیں جس میں لوگوں کو گھروں میں رہنے اور بلا عذر و ضرورت باہر آنے سے پرہیز کرنے کی اپیل کی جا رہی ہے۔
