سال 2023 جموں و کشمیر میں سیاحتی اعتبار سے تاریخی سال رہا

Tourists visits JK in 2023 سرکاری اعداد و شمار کے مطابق سال 2023 کے دوران جموں وکشمیر میں سیاحوں کی تعداد 2 کروڑ سے تجاوز کرگئی جس سے گذشتہ برسوں کے تمام ریکارڈ ٹوٹ گئے۔سال گذشتہ ایک کروڑ 88 لاکھ سیاح جموں وکشمیر کے سیاحوں مقامات سے محظوظ ہوئے تھے۔

سرینگر:یوں تو جموں وکشمیر قدرتی حسن و جمال سے مالا مال ہونے کے باعث ہر سال دنیا بھر کے سیاحوں کے لئے انتہائی پُر کشش ہے، لیکن سال 2023 میں ریکارڈ توڑ تعداد میں سیاحوں کی آمد کو سیاحتی طور تاریخی قرار دیا جا رہا ہے۔

سرکاری اعداد و شمار کے مطابق سال 2023 کے دوران جموں وکشمیر میں سیاحوں کی تعداد 2 کروڑ سے تجاوز کرگئی جس سے گذشتہ برسوں کے تمام ریکارڈ ٹوٹ گئے۔سال گذشتہ ایک کروڑ 88 لاکھ سیاح جموں وکشمیر کے سیاحوں مقامات سے محظوظ ہوئے تھے۔

سایحتی مقام گلمرگ

محکمہ سیاحت کے عہدیداروں کا ماننا ہے کہ سال 2023 شعبہ سیاحت کے لئے ایک غیر معمولی اور مثالی سال رہا۔انہوں نے کہا کہ 'اس سال کے دوران دو کروڑ سے زیادہ سیاحوں نے جموں وکشمیر کے مختلف صحت افزا مقامات کی سیر کی ان سیاحوں میں غیر ملکی سیاحوں کی اچھی تعداد شامل تھی'۔ان کا کہنا تھا کہ سال 2023 کے دوران نہ صرف ملکی بلکہ غیر ملکی سیاحوں کی آمد کی تعداد میں بھی اضافہ دیکھا گیا۔حکام کا ماننا ہے کہ سرینگر میں ماہ مئی میں منعقدہ جی ٹوئنٹی ٹورزم اجلاس سیاحوں کے بے تحاشا رش کا ایک بڑا محرک ہے۔

سرکاری ذرائع کے مطابق سیاحوں کے ریکارڈ توڑ آمد سے جموں وکشمیر میں روزگار کے بسیار مواقع پیدا ہونے سے یہاں کی معیشت کو استحکام مل گیا۔انہوں نے کہا کہ سال 2023 کے دوران شعبہ سیاحت میں نوجونوں کو بالواسطہ یا بلا واسطہ 2.2 ملین نوکریاں فراہم کی گئیں۔

سال 2023 جموں و کشمیر میں سیاحتی اعتبار سے تاریخی سال رہا

سال 2023 کے دوران جموں وکشمیر میں متعدد نئے سیاحتی مقامات کو متعارف کیا گیا جہاں سال بھر سیاحوں کی آمدو رفت کا سلسلہ جاری رہا۔سرکاری ذرائع کے مطابق جموں وکشمیر لگ بھگ 75 نئے سیاحتی مقامات کو متعارف کیا گیا، جہاں انفراسٹرکچر اور دیگر سہولیات کو دستیاب رکھا جا رہا ہے تاکہ شعبہ سیاحت مضبوط سے مضبوط تر ہو کر زیادہ سے زیادہ لوگوں کے روز گار کا موجب بن سکے۔

ٹیولپ گارڈن سرینگر

سرینگر میں شہرہ آفاق جھیل ڈل کے کناروں پر واقع ایشیا کے سب سے بڑے باغ گُل لالہ 19 مارچ 2023 کو سیاحوں کے لئے کھول دیا گیا۔سرکاری اعداد شمار کے مطابق سال 2023 کو 3 لاکھ 35 ہزار سیاح اس باغ کے دلکش و دلآویز نظاروں سے محظوظ ہوئے جن میں مقامی و غیر مقامی سیاح شمال تھے۔سال گذشتہ 3 لاکھ 60 ہزار سیاحوں نے باغ گل لالہ کی سیر کی تھی۔انہوں نے کہا کہ سال 2023 میں زائد از تین لاکھ مقامی اور 3 ہزار سے زیادہ غیر ملکی سیاح باغ گُل لالہ کے حسین نظاروں سے لطف اندوز ہوئے۔اس باغ میں سیاحوں کی دلچسپی کے لئے امسال زائد از 68 اقسام کے 16 لاکھ گل لالہ اگئے گئے تھے۔

وادی کے دیگر سیاحتی مقامات خاص طور پر شہرہ آفاق سیاحتی مقام گلمرگ میں وینٹر ٹورزم کے پیش نظر سیاحوں کی آمد سلسلہ زوروں سے جاری ہے۔شعبہ سیاحت کے علاوہ جموں وکشمیر میں سال 2023 امرناتھ یاترا اور ماتا ویشنو دیوی یاترا کے لئے بھی شاندار اور تاریخی سال رہا۔

امرناتھ یاترا 2023

سرکاری اعداد و شمار کے مطابق سال 2023 کے دوران 62 دنوں پر محیط امرناتھ یاترا کے دوران قریب ساڑھے چار لاکھ یاتریوں نے پوتر گُھپا کا درشن کیا۔سال گذشتہ 3 لاکھ 65 ہزار یاتریوں نے پوتر گھپا کا درشن کیا۔ضلع ریاسی کے کٹرہ علاقے کی ترکوٹہ پہاڑیوں میں واقع ماتا ویشنو دیوی مندر میں سال 2023 کے دوران ریکارڈ تعداد میں یاتریوں کی آمد ریکارڈ ہوئی۔سرکاری اعداد و شمار کے مطابق سال 2023 کے دوران 93.68 لاکھ یاتریوں نے پوتر گھپا کا درشن کیا جو گذشتہ دس برسوں میں سب سے زیادہ تعداد ہے۔حکام کا کہنا یہ سال رواں کے اختتام تک یہ تعداد 96 لاکھ تک پہنچنے کی توقع ہے۔

(یو این آئی)