سری نگر: جنوبی کشمیر کے ضلع شوپیاں کو صوبہ جموں کے ضلع پونچھ اور راجوری کے ساتھ جوڑنے والی تاریخی مغل روڈ پر برف ہٹانے کا کام شد و مد سے جاری ہے۔ متعلقہ حکام کا کہنا ہے کہ اس تاریخی روڈ کو دو ہفتوں کے اندر دوبارہ کھول دیا جائے گا۔ بتادیں کہ مغل روڈ کو ماہ جنوری کے پہلے ہفتے میں بھاری برف باری کی وجہ سے ٹریفک کی نقل و حمل کے لئے بند کر دیا گیا تھا۔ ایک عہدیدار نے بتایا کہ تاریخی مغل روڈ سردیوں کے دوران بھاری برف باری کی وجہ سے بند رہتا ہے۔ انہوں نے کہا کہ اس روڈ سے برف ہٹانے کے لئے مشینری اور افرادی قوت کو کام پر لگا دیا گیا ہے۔ ان کا کہنا تھا کہ امسال بالائی علاقوں میں گذشتہ برسوں کے مقابلے میں کم برف باری ہوئی ہے جس کے پیش نظر روڈ کو صاف کرنے میں کم وقت لگے گا۔
عہدیدار نے کہا کہ 'اس روڈ پر دو ہفتوں کے اندر برف ہٹانے کا کام مکمل ہونے کی توقع ہے جس کے بعد اس کو دوبارہ کھول دیا جائے گا۔ زیادہ تر لوگ اس سڑک کو کاروباری مقاصد کے لیے استعمال کرتے ہیں۔ مغل روڈ سے برف ہٹانے کا کام کرنے والے پی ڈبلیو ڈی مکینیکل ونگ کے حکام کا کہنا ہے کہ مغل روڈ سے برف ہٹانے کا کام تیزی سے جاری ہے۔ انہوں نے کہا کہ 'مغل روڈ مئی کے پہلے ہفتے میں گاڑیوں کی آمدورفت کے لیے کھول دی جاتی ہے۔ اس بار برف باری کم مقدار میں ہوئی ہے جس کی وجہ سے برف ہٹانے کا کام جلد کر لیا جائے گا۔ دریں اثنا وادی کو ملک کے باقی حصوں کے ساتھ جوڑنے والی سری نگر- جموں قومی شاہراہ پر ٹریفک کی دو طرفہ نقل و حمل جا ری ہے۔ سری نگر- جموں قومی شاہراہ پر بڑی گاڑیوں کو دوپہر کے بعد روانہ کیا جائے گا۔
یہ بھی پڑھیں: Snow Clearance In Mughal Road مغل روڈ پر برف ہٹانے کا کام شدومد سے جاری
یو این آئی
