جنوبی کشمیر کے شوپیان ضلع کے راولپورہ علاقے میں تین روز سے جاری انکاؤنٹر میں اب تک دو عسکریت پسندوں کو ہلاک کیا گیا ہے جبکہ انکاؤنٹر کے مقام پر تین رہائشی مکان بھی تباہ ہو گئے ہیں
ہفتہ کی صبح حفاظتی اہلکاروں نے راولپورہ، شوپیاں کو اس وقت محاصرے میں لے لیا جب انہیں علاقے میں عسکریت پسندوں کے چھپے ہونے کی اطلاع موصول ہوئی تھی۔ ہفتہ کی شام کو عسکریت پسندوں اور حفاظتی اہلکاروں کے مابین گولیوں کا تبادلہ شروع ہوا، جو ابھی بھی جاری ہے۔
انکاؤنٹر کے دوران اب تک دو عسکریت پسندوں کو ہلاک کیا جا چکا ہے۔ جن کی شناخت شوپیاں کے نارہ پورہ کے رہنے والے جہانگیر احمد وانی ولد محمد عبداللہ وانی کے طور پر ہوئی ہے۔ جبکہ دوسرے عسکریت پسند کی شناخت جیش محمد کے ٹاپ کمانڈر ولایت حسین لون عرف سجاد افغانی کے بطور ہوئی ہے۔ جہانگیر احمد وانی کو گزشتہ روز ہلاک کیا گیا تھا تاہم سجاد افغانی آج صبح ہلاک کیا گیا ہے۔ سجاد افغانی ستمبر 2018 سے سرگرم تھا، جو راولپورہ علاقے کا رہنے والا تھا۔
وہیں، پولیس نے بھی ٹویٹ کرتے ہوئے ولایت حسین کے ہلاک ہونے کی تصدیق کی ہے۔
گزشتہ روز ایک عسکریت پسند کی لاش برآمد کیے جانے کے بعد حفاظتی اہلکاروں کو علاقے میں مزید عسکریت پسندوں کے چھپے ہونے کا خدشہ تھا جس دوران علاقے کو لگاتار محاصرے میں رکھا گیا۔ اور آج صبح انکائونٹر کے مقام پر عسکریت پسندوں اور فورسز کے مابین پھر سے گولیوں کا تبادلہ شروع ہو گیا۔
تصادم کے دوران تین رہائشی مکانوں کو بھی زمین بوس کردیا گیا ہے۔
گزشتہ روز انکاؤنٹر کے دوران مقامی نوجوانوں نے فورسز اہلکاروں پر پتھراؤ کیا جنہیں منتشر کرنے کے لیے فورسز اہلکاروں نے پیلٹ اور آنسو گیس کا استعمال کیا، جس کے نتیجہ میں تین نوجوان زخمی ہوگئے ہیں جن میں پیلٹ لگنے سے زخمی ہوئے نظیر احمد وانی کو ضلع اسپتال شوپیان سے سرینگر کے ایس ایم ایچ ایس ہسپتال منتقل کیا گیا ہے۔
پتھراؤ کے دوران ایک پولیس اہلکار کے زخمی ہونے کی بھی اطلاع ہے۔
