رام بن: وادی کشمیر کے ساتھ ساتھ خطہ چناب میں بھی انتظامیہ قدرتی حسن سے مالا مال کئی دلفریب مقامات کو سیاحتی نقشے پر لانے کے لیے اقدامات اٹھا رہی ہے۔ صوبہ جموں کے رام بن ضلع میں گھوڑا گلی کے بعد اب وادی مہو منگت کو بھی پروموٹ کیا جا رہا ہے۔ مقامی و ملکی سیاحوں کے علاوہ بین الاقوامی سیاح بھی ان قابل دید سیاحتی مقامات کا رخ کر رہے ہیں۔ ضلع رام بن کے خوبصورت اور فلک بوس پہاڑوں میں واقع وادی مہو منگت میں بین الاقوامی سیاحوں کی آمد کو نہ صرف مقامی باشندے بلکہ سیاحتی شعبہ سے جڑے افراد اور سیول انتظامیہ سمیت ٹورزم محکمہ بھی نیک شگون قرار دے رہے ہیں۔
محکمہ ٹورزم سمیت سول انتظامیہ کے علاوہ فوج بھی مہو منگت کو پروموٹ کر رہے ہیں۔ اور قدرتی حسن سے مالا مال وادی مہو منگت میں سیاحوں کی آمد سے ممکنہ طور پر مقامی باشندوں کو بھی روزگار کے وسائل مہیا ہوں گے۔ قابل ذکر ہے کہ جموں و کشمیر کی ایک وسیع آبادی بالواسطہ یا بلاواسطہ سیاحتی شعبہ کے ساتھ جڑی ہوئی ہے اور جموں و کشمیر کی معیشت میں ٹورزم کو ریڑھ کی ہڈی قرار دیا جا رہا ہے۔
