جموں وکشمیر میں سرمائی تعطیلات اور کورونا وبا کے بعد بند تعلیمی اداروں کا کھلنا خوش آئند بات ہے۔ لیکن کچھ کالجز میں عمارت نا نکمل ہونے کی وجہ سے طلباء کو مشکلات درپیش ہیں۔
ضلح رامبن کے سب ڈویژن گول میں دو ہزار گیارہ-بارہ میں گورنمنٹ ڈگری کالج کا افتتاح ہوا، لیکن یہ عمارت آج تک مکمل نہ ہو سکی۔ اس سے طلباء کو مشکلات درپیش ہیں۔
یہ کالج دو کمروں کی عمارت میں چلا رہا ہے، جس سے یہاں کے طلبا کو سخت پریشانیوں کا سامنا ہے۔ دو کمروں پر مشتمل اس کالج میں صرف ایک سٹاف روم اور دوسرا کلاس روم ہے۔
کالج میں لائبریری کے لئے جگہ نہ ہونے کی وجہ سے کتابیں اسٹاف روم میں رکھی گئی ہیں۔ باتھ روم و دیگر بنیادی سہولت کے نہ ہونے کی وجہ سے گورنمنٹ ڈگری کالج گول میں تعلیم حاصل کر رہے طلباء کو دقتیں ہیں۔
یہ بھی پڑھیں: رامبن: سومو ڈرائیورز پر زیادہ کرایہ وصول کرنے کا الزام
مقامی لوگوں کا کہنا ہے کہ سنہ 2016-17 میں موئلہ علاقہ میں کالج کی عمارت کی تعمیر کا کام شروع ہوا جو ڈیڑھ برس میں مکمل ہونا تھا۔ آج چار برس ہو گئے ہیں اس کالج کی تعمیر ابھی بھی مکمل نہیں ہو پائی ہے۔ تقریباً چھ کروڑ روپے کی لاگت سے تعمیر ہو رہی اس عمارت کا کام سست رفتاری سے چل رہا ہے۔
بچوں کا کہنا ہے کہ کالج میں بیٹھنے کے لئے مناسب جگہ دستیاب نہ ہونے کی وجہ سے ان کی تعلیم پر اثر پڑ رہا ہے۔ طلباء نے انتظامیہ سے اپیل کی ہے کہ عمارت کی تعمیر کا کام جلد مکمل کیا جائے تاکہ وہ اچھے سے تعلیم حاصل کر سکیں۔
