صوبہ جموں کے ضلع راجوری میں ایک بار پھر انتظامیہ کی جانب سے مکمل لاک ڈاؤن کا اعلان کیا گیا ہے، گذشتہ روز پولیس نے شہر میں اعلان بھی کیا ہے کہ لوگ اپنی دکانیں نہ کھولیں اور گھروں میں ہی رہیں۔
گذشتہ روز ضلع میں کووڈ-19 کے 51 نئے معاملے سامنے آنے کے بعد اڈیشنل ڈپٹی کمشنر ٹھاکر شیر سنگھ نے اپنے ٹویٹر ہینڈل پر راجوری قصبہ میں مکمل لاک ڈاؤن کا اعلان کیا۔
انہوں نے اپنے ٹویٹ میں لکھا 'راجوری قصبہ میں 11 تاریخ سے مکمل لاک ڈاؤن نافذ کیا جارہا ہے، جن علاقوں میں لاک ڈاؤن نافذ رہے گا، ان میں راجوری، جواہر نگر، کھانڈلی، جی ایم سی روڑ، سلانی برج، درہالی برج سے لے کر پی جی کالج تک، گجر منڈی اور ملک مارکٹ شامل ہیں'۔
انتظامیہ نے ان علاقوں میں کنٹیکٹ ٹریسنگ کے بعد لاک ڈاؤن نافذ کرنے کا فیصلہ کیا ہے۔
اس کے علاوہ ٹھاکر شیر سنگھ نے یہ بھی کہا ہے کہ لاک ڈاؤن کے سلسلے میں ایک تفصیلی آرڈر بھی نکالا جائے گا۔
گذشتہ روز ضلع میں کورونا وائرس کے اب تک کے سب سے زیادہ 51 معاملے سامنے آئے ہیں، جسکے بعد ضلع پوری طرح کووڈ-19 کا ہاٹ اسپاٹ بن چکا ہے۔
وہیں جموں و کشمیر میں کووڈ-19 کے معاملات میں تیزی دیکھی جارہی ہے، خطے میں کورونا وائرس سے 9 ہزار 888 افراد متاثر ہو چکے ہیں جبکہ 159 افراد اس وبا سے ہلاک ہو چکے ہیں۔
صوبوں کے حساب سے اگر بات کی جائے تو جموں میں ابھی تک 2 ہزار 94 افراد کووڈ-19 سے متاثر ہوئے ہیں جبکہ کشمیر میں 7 ہزار 794 افراد متاثر ہوئے ہیں۔
