ضلع راجوری میں آٹو رکشا ڈرائیوروں نے منگل کو اسسٹنٹ ریجنل ٹرانسپورٹ آفیسر (اے آر ٹی او) کے خلاف احتجاج کیا۔
احتجاج کررہے آٹو رکشا ڈرائیوروں نے اے آر ٹی او پر آٹو رکشا ڈرائیوروں کو بلا وجہ ہراسان کرنے کا الزام عائد کرتے ہوئے ان کے خلاف کارروائی کا مطالبہ کیا۔
احتجاجیوں کے مطابق اے آر ٹی او نے ایک آٹو رکشا ڈرائیور کو رکنے کا اشارہ کیا، آٹو رکشا ڈرائیور کے مطابق ’’اس سے قبل کہ گاڑی کے کاغذات چیک کیے جاتے، اے آر ٹی او کے ڈرائیور نے بلاوجہ گاڑی کی توڑ پھوڑ شروع کی۔‘‘
انہوں نے دعویٰ کیا کہ ’’لائسنس سمیت دیگر دستاویز چیک کیے بغیر ہی اے آر ٹی او نے گاڑی کا نقصان کیا اور وہاں سے فرار ہو گئے۔‘‘
- مزید پڑھیں: راجوری: شارٹ سرکٹ سے نوجوان کی موت
آٹو رکشا ڈرائیوروں کے مطابق ’’اے آر ٹی او کی جانب سے آٹو رکشا ڈرائیوروں کو تنگ کیے جانے کا یہ پہلا واقعہ نہیں، اس سے قبل بھی متعدد مرتبہ غریب ڈرائیوروں کو خواہ مخواہ تنگ کرنے کے علاوہ گاڑیوں کا نقصان بھی کیا جاچکا ہے۔‘‘
