ضلع راجوری کے تھانہ منڈی میں سرگرم ایک غیرسرکاری تنظیم راہ حق پیرپنجال نے تھانہ منڈی میں سڑک پر جموں و کشمیر پولیس و ٹریفک پولیس کے ہمراہ ایک بیداری مہم کا آغاز کیا۔ اس دوران سب نے مل کر سڑک پر چلنے والی تمام گاڑیوں کے ڈرائیورز کو ٹریفک قانون کی پاسداری کرنے کی گزارش کی۔
اس موقع پر تنظیم کے ایک رکن نے کہا کہ اکثر لوگ جب بھی گاڑیاں چلاتے ہیں تو وہ ٹریفک قوانین کی پاسداری نہیں کرتے ہیں، اس لیے انہوں نے ہر گاڑی کو روک کر ڈرائیورز کو ٹریفک قوانین سے آگاہ کیا۔
اس موقع پر ڈرائیورز کو بتایا گیا کہ گاڑی چلاتے وقت سیٹ بیلٹ کا استعمال لازمی ہے۔ اسی طرح موٹر سائیکل اسکوٹر و اسکوٹی چلاتے وقت ہیلمیٹ کا استعمال بھی ضروری ہے۔
یہ بھی پڑھیں: پونچھ: گاڑی کھائی میں گری، متعدد زخمی
ایس ایچ او تھانہ منڈی نے کہا کہ کوئی آپ کا اپنا آپ کے گھر پر انتظار کر رہا ہے۔ گاڑی چلاتے وقت ٹریفک قوانین کی پاسداری کریں، جس سے آپ کی بھی جان کو خطرہ نہ ہو اور دوسرا بھی محفوظ رہے۔
این جی او کے چیئرمین منظور علی شاہ و انجینیئر ارشد اعجاز نے کہا کہ لوگوں کو ٹریفک قانون سے روبرو کرانا ایک اچھا قدم ہے۔ انہوں نے کہا کہ ان کی تنظیم ایسی بیداری مہم چلاتی رہے گی اور امید ہے کہ ہر شخص ٹریفک قوانین کی پاسداری کرے گا۔
