اینٹی کرپشن بیورو کی جانب سے کی گئی ایک کارروائی کے دوران جموں صوبہ کے راجوری ضلع میں محکمہ جنگلات کے دو ملازمین کو رشوت لیتے ہوئے گرفتار کر لیا گیا۔
اس سلسلہ میں اینٹی کروپشن بیورو کو ایک شکایت موصول ہوئی تھی جس میں کہا گیا تھا کہ محکمہ جنگلات کے دو ملازمین ایک شکایت کو حل کرنے کے لیے 40 ہزار روپے کا مطالبہ کر رہے ہیں۔
شکایت میں کہا گیا تھا کہ ڈی ایف او راجوری کو ایک شکایت کی گئی تھی جس کو حل کرنے کےلئے آفیسر موصوف نے ملازمین کو حکم جاری کیا تھا لیکن ملازمین جن میں فارسٹ گارڈ انیل کمار اور فارسٹر اعجاز مرزا شامل ہیں، نے شکایت کنندہ کے حق میں فیصلہ کرنے کے لئے 40 ہزار روپے کی رشوت مانگی۔
اینٹی کرپشن بیورو نے شکایت موصول ہونے کے ساتھ ہی دونوں ملزمان کو رنگے ہاتھوں گرفتار کرنے کےلئے کارروائی عمل میں لائی جس کے دوران فارسٹ گارڈ انیل کمار رشوت لیتے ہوئے گرفتار ہوا۔ جس کے بعد اے سی بی نے محکمہ کے رینج فارسٹر کو بھی گرفتار کرلیا۔
اینٹی کرپشن بیورو نے اس سلسلہ میں ایک کیس درج کر کے مزید تحقیقات بھی شروع کر دی ہے۔
یہ بھی پڑھیں: اننت ناگ: پولیس کی پٹائی سے صحافی زخمی
