کورونا بحران کے پیش نظر گھر واپسی کی عجلت کی وجہ سے مدھیہ پردیش کے مورینا ضلع کے راجستھان سرحد سے ملحق الاویلی پولیس اسٹیشن کے احاطے میں مزدوروں کا اکھٹا ہونا جاری ہے۔
سرکاری اطلاع کے مطابق سرحد پر واقع یہ پولیس چوکی گزشتہ دو مہینے سے باہر سے آنے والے مزدوروں کی پناہ گاہ بنی ہوئی ہے۔ یہاں پر روزانہ راجستھان، اترپردیش اور دہلی سے تقریبا پندرہ ہزار مزدوروں کا آنا جاری ہے۔
ضلع انتظامیہ نے یہاں سے مزدوروں کو مدھیہ پردیش میں ان کے آبائی ضلع بھیجنے کے لئے تقریبا ایک سو نجی بسوں کا انتظام کیا ہے۔
یہاں آنے والے مزدوروں کے لئے کھانے پینے کا انتظام مورینا پولس کررہی ہے۔ مدھیہ پردیش کی سرحد پر واقع الاویلی کے احاطے میں محکمہ محصول اور صحت کی ٹیمیں تین تین شفٹوں میں ڈیوٹی دے رہی ہیں۔
ذرائع کے مطابق یہاں آنے والے تقریبا پندرہ ہزار مزدوروں کو بسوں سے ان کے ضلعوں میں بھیجا جارہا ہے۔
