محرم الحرام کی عالمِ اسلام میں کیا اہمیت ہے؟

مفتی خالد کا کہنا ہے کہ جو اللہ کے نیک لوگ ہیں وہ اس ماہ کو کافی زیادہ بہترین طریقے سے گزارتے ہیں، اس ماہ میں زیادہ سے زیادہ قرآن کی تلاوت کرنی چاہیے۔

اسلامی سال کے مقدس مہینہ محرم الحرام کا آج پہلا دن ہے، اسی سلسلے میں راجستھان کے شہر جے پور میں ای ٹی وی بھارت کے نمائندے نے مفتی خالد ایوب مصباحی سے بات چیت کی۔

مفتی خالد ایوب مصباحی کا کہنا ہے کہ حضرت آدم علیہ السلام کی توبہ اس مقدس مہینے میں قبول ہوئی، حضرت نوح علیہ السلام کی کشتی بھی اسی ماہ میں پار لگی، حضرت یونس علیہ السلام مچھلی کے پیٹ سے باہر آئے، اسی طرح بہت سارے نبیوں کے ساتھ اہم واقعات اسی ماہ کی 10 تاریخ کو پیش آئے۔

انہوں نے کہا کہ 'آخری پیغمبر حضور نبی کریم صلی اللہ علیہ وسلم کے نواسے حضرت امام حسین رضی اللہ تعالی عنہ کی جو شہادت ہے وہ بھی اسی ماہ میں 10 تاریخ کو ہوئی'۔

انہوں نے کہا کہ 'محرم الحرام کے اس ماہ کو عالم اسلام میں کافی زیادہ مقبولیت حاصل ہے، اس ماہ کو کافی زیادہ عظمتوں کی نگاہ سے دیکھا جاتا ہے'۔

مفتی خالد کا کہنا ہے کہ 'جو اللہ کے نیک لوگ ہیں وہ اس ماہ کو کافی زیادہ بہترین طریقے سے گزارتے ہیں، اس ماہ میں زیادہ سے زیادہ قرآن کی تلاوت کرنی چاہیے۔ حضرت حسین رضی اللہ تعالی عنہ کو خوش کرنے کے لئے زیادہ سے زیادہ غریبوں کی مدد بھی کرنی چاہیے۔'

انہوں نے کہا کہ 'موجودہ وقت میں جس طرح سے کورونا وباء کے پیش نظر لاک ڈاون نافذ کیا گیا، اس کی وجہ سے عوام بے روزگار ہے، لوگوں کو ان کی 'مدد کرنی چاہیے اور ان کو ضروریات کا سامان فراہم کرانا چاہیے۔