گاڑی کی ٹکر سے دو خواتین کی موت

راجستھان کے ضلع جھنجو کے بوہانہ قصبہ میں ستنالی روڈ پر کینٹین کے قریب آج ایک نامعلوم گاڑی کی ٹکر سے دو خواتین کی موت ہوگئی جبکہ ایک خاتون شدید زخمی ہوگئی جسے علاج کے لئے جھنجھنو کے اسپتال میں داخل کرایا گیا ہے۔

موصولہ اطلاعات کے مطابق رٹائرڈ ٹیچر شکنتلا دیوی (65)، پوجا رائیکہ(33) اوررٹائرڈ نرس گیتا دیوی صبح کے وقت سڑک پر چہل قدمی کیلئے نکلی تھیں ۔ سڑک پر جاتے وقت انہیں نامعلوم گاڑی نے ٹکر ماردی، جس سے پوجا رائیکہ کی موقع پر ہی موت ہوگئی۔ جبکہ شکنتلا دیوی علاج کے دوران چل بسیں۔

پوجا رائیکہ گاڑی سے اس بری طرح سے کچلی گئی تھی کہ اس کے جوتے سے ان کی شناخت ہوئی۔ شدید زخمی گیتا دیوی کا علاج چل رہا ہے۔ تھانہ بوہانہ نے نامعلوم گاڑی کے خلاف رپورٹ درج کرکے گاڑی کی تلاش شروع کردی ہے۔